"Türk əsgərinin Qarabağda vuruşması üçün hüquqi baza var" - Hərbi ekspert

Türkiyənin müdafiə naziri Hulusi Akar sensasion bəyanatla çıxış edib. Nazir Azərbaycan, Rusiya prezidentlərinin və Ermənistan baş nazirinin iştirakı ilə imzalanan üçtərəfli sazişin pozulacağı təqdirdə, müharibə variantına keçə biləcəklərini deyib. O, Türkiyənin Azərbaycanın işğaldan azad olunan ərazilərinin təhlükəsizliyini təmin etmək üçün öhdəlik götürdüyünü bildirib.

Maraqlıdır, H.Akarın bu bəyanatla çıxış etməsi hansı zərurətdən doğub? Müharibənin yenidən başlayacağı təqdirdə Türkiyənin tərəf kimi iştirakı mümkündürmü?

Azsiyasət.com xəbər verir ki, məsələ ilə bağlı açıqlama verən hərbi ekspert Şair Ramaldanov qeyd edib ki, “Azərbaycan Respublikası və Türkiyə Respublikası arasında strateji tərəfdaşlıq və qarşılıqlı yardım haqqında” müqavilədə 4 bənd sırf təhlükəsizlik məsələsinə həsr olunub:

“Orada qarşılıqlı yardımdan tutmuş bütün məsələlər öz əksini tapıb. Digər tərəfdən Türkiyə Böyük Millət Məclisi Azərbaycanda türk əsgərlərinin fəaliyyəti ilə bağlı qərar qəbul edib. Yəni iki dövlətin qarşılıqlı addım atması üçün hüquqi baza mövcuddur. Ola bilsin ki, cərəyan edə biləcək məsələləri əvvəlcədən proqnozlaşdırılaraq bu qərarlar qəbul olunub. Düşünürəm ki, bu bəyanat da boş yerə verilməyib, yaranmış vəziyyətlə əlaqədardır. Burada qanunsuz heç nə yoxdur. Azərbaycan qələbə çalıb, ərazi bütövlüyünü bərpa edib. Artıq Ermənistanla dövlət sərhəddimizdə təmas xətti yoxdur. Düzdür, hazırda müəyyən narahatlıq mövcuddur. Lakin biz ekspertlər bunu əvvəldən də proqnozlaşdırırdıq. Çünki separatçı rejimin partizan müharibəsinə hazırlıqla bağlı hələ müharibə başlamadan əvvəl müəyyən video-görüntüləri vardı. Erməni mediasında açıq şəkildə bu haqda müzakirələr gedirdi. Düşünürəm ki, partizan müharibəsi elementləri ilə azad edilmiş ərazilərdə rastlaşacağıq. Digər tərəfdən erməni hərbi-siyasi rəhbərliyi hələ əvvəldən terrorçularla sıx əlaqədə idi. Onlar dövlət tərəfindən yox, məhz diasporlar tərəfindən maliyyələşdirilirdi”.

Yenisabah.az