"Yollardan birinə tam şəkildə Azərbaycan nəzarət edir" - Qafan meri
Azərbaycan ərazilərində əbədi məskunlaşacaqlarını zənn edən ermənilər 10 noyabr razılaşmasına uyğun olaraq ərazilərimizin azad olunması, sərhədlərin demarkasiyası prosesinin aparıldığı bu günlərdə hay-küy salıblar. İşğalçı ölkənin mediası yazır ki, Zəngəzur vilayətindəki yollardan birinə tam şəkildə Azərbaycan tərəf nəzarət edir.
Azsiyasət.com xəbər verir ki, bunu Qafan meri Gevork Parsyan parlamentdəki dinləmələrdə bildirib. Onun sözlərinə görə, cənub-şərq sərhədində demarkasiya prosesinin aparılması nəticəsində Ermənistanın bir çox yolları faktiki olaraq Azərbaycanın nəzarətinə keçib, həmçinin bəzi yaşayış məntəqələri faktiki olaraq blokadadadır.
Mer deyib ki, indi onların üç problemli yolları var Qafan-Gorus, Qafan-Çakaten və Qafan-Aqarak. Onun sözlərinə görə, ilk iki yoldan hələ də istifadə etmək mümkündür. Amma üçüncü yol tam şəkildə Azərbaycanın nəzarətinə keçib. Parsyan deyib ki, Qafan-Aqarak yolu Azərbaycanın nəzarəti altına düşdüyü üçün həmin kəndin sakinləri, həmçinin Yeqvard və Udjanis camaatı nəqliyyat blokadasına düşüblər.
Merin iddiasına görə, problemin ideal variantı Lernadzor kəndindən Qarakilsə istiqamətinə tunelin çəkilməsidir. Onun sözlərinə görə, hətta vaxtilə Zəngəzurda bu layihəni reallaşdırmaq istəyiblər, ancaq bir metr də olsun yol çəkilməyib.
