NATO Azərbaycanla bağlı məxfi toplantı keçirdi - DRON görüntüləri tək-tək araşdırıldı

Azərbaycan ordusunun Ermənistanın işğalı altında olan torpaqları azad etmək üçün Qarabağda apardığı 44 günlük müharibənin təcrübəsini təhlil etmə üçün NATO Berlində fövqəladə və məxfi toplantı keçirib. Toplantıya Pentaqonun yüksək vəzifəli şəxsləri qorunan internet kanalları üzərindən online qatılıb.

Bildirilir ki, toplantıda NATO ölkələrinin hərbi mütəxəssisləri və planlaşdırıcıları Azərbaycan ordusunun zərbə pilotsuz aparatları və digər dronlarla Ermənistan ordusuna qarşı həyata keçirdiyi həmlələri, həmin həmlələrə dair Azərbaycan Müdafiə Nazirliyinin yaydığı görüntüləri diqqətlə araşdırıblar. Gizli toplantı ilə bağlı Almaniya Müdafiə Nazirliyindəki mənbə belə deyib: “Biz silahlanma və müharibə strategiyasında indiyə qədər olduğu kimi davam etsək uduzacağıq”.

Toplantıda Azərbaycanın Ermənistan üzərində qazandığı qələbədə xüsusən döyüş pilotsuz aparatlarının rolu araşdırılıb. Görüntülər tək-tək təhlil edilərək Azərbaycan ordusunun düşmənin yüzlərlə tankını, zirehli texnikasını, hərəkətdə olan və stasionar hərbi hədəflərini, canlı qüvvəsini necə məhv etdiyinə dair videolar izlənilib.

Məlumatda deyilir ki, bu toplantının ardınca NATO ölkələrindən ilk dəfə Almaniya PUA-ların raketlərlə silahlandırılması konsepsiyasını həyata keçirməyə başlayıb. Lakin parlamentdəki solçular hələlik bu plana müqavimət göstərir.