ABŞ-dakı hadisələr dolların mövqeyinə təsir göstərəcəkmi?

ABŞ Prezidenti Donald Trampın on minlərlə tərəfdarı Vaşinqtonda seçkilərin Co Baydenin qələbəsi ilə nəticələnməsinə etiraz olaraq aksiyaya başlayıblar. Dünən isə Tramp tərəfdarları Kapitoliyaya daxil olublar. Konqresə hücum nəticəsində baş verən toqquşmalarda 4 nəfər ölüb, 52 nəfər həbs olunub.

Bundan sonra Vaşinqton meri şəhərdə komendant saatı elan edib.

Hazırda isə əsas suallardan biri budur: Baş verənlər Azərbaycanda və dünyada dolların mövqeyinə təsir göstərəcəkmi?

Azsiyasət.com xəbər verir ki, mövzu ilə bağlı bakupost.az-a danışan iqtisadçı-ekspert Samir Əliyev bildirdi ki, ABŞ-da baş verən proseslər dolların məzənnəsinə ciddi təsir etməyəcək:

"Ola bilər ki, qısamüddətli təsiri olsun. Bu məsələ də həllini tapacaq. İlkin məlumatlar onu göstərir ki, ABŞ prezidenti Donald Tramp geri çəkilmək və hakimiyyəti rəsmi qaydada ötürmək niyyətindədir. Ona görə də bu, dollar üçün hər hansı problem yaratmayacaq. Dollar bu gün alternativsiz valyutadır. Dünyada ən etibarlı valyuta hesab olunur.
Azərbaycanda isə devalvasiyanın olacağını birmənalı demək çətindir. Çünki bu, neftin qiymətindən asılıdır. Həmçinin vaksinləşmənin pandemiyaya təsiri ilə də bağlı olacaq".

Ekspert əlavə etdi ki, pandemiya aradan qalxarsa, aktivlik artacaq və neftin qiymətinin heç olmasa, indiki səviyyədə qaldığını görəcəyik:

"Vaksin faydasız olarsa, ötən ilin mart ayında olduğu kimi yenidən neftin ucuzlaşması ehtimalı var. Bu da Azərbaycan manatına mənfi təsir göstərə bilər. Azərbaycan hökuməti də manatın məzənnəsini saxlamaq niyyətindədir. Maksimum dərəcədə saxlamağa da çalışacaqlar. Amma buna nə dərəcədə nail ola biləcəklər? Düşünürəm ki, ilin birinci yarısında hakimiyyət gözləmə mövqeyində olacaq. Ondan sonra bazardakı vəziyyətə baxacaq və qərar verəcək ki, məzənnəni indiki səviyyədə saxlasın, yoxsa dəyişsin. Amma bir məsələ aydındır ki, manatın məzənnəsini saxlamaq üçün 2015-ci ildən fərqli olaraq, indi hökumətin imkanları daha çoxdur"