"Həmsədrlərdən imtina bizə lazım deyil" - "Gəlsinlər, getsinlər, biz isə öz işimizi davam etdirək..."
Elxan Şahinoğlu: "Azərbaycan da Türkiyə kimi Minsk Qrupundan imtinanı lazım bilmir"
Türkiyənin Müdafiə naziri Mövlud Çavuşoğlu bildirib ki, ATƏT-in Minsk Qrupu lazım olacağı halda yenidən öz rolunu oynaya bilər.
"Bunun üçün həmsədrlər ilk növbədə konstruktiv və konkret yanaşma tutmalı, əvvəllər göstərilən zəif vasitəçilik səviyyəsindən dərs çıxarmalıdılar”, - deyə M.Çavuşoğlu bildirib.
Xatırladaq ki, Çavuşoğlu və Türkiyə Prezidenti Rəcəb Tayyib Ərdoğan son illər haqlı olaraq həmsədrləri tənqid edir, 25 ildə onların fəaliyyətinin yarıtmaz olduğunu vurğulayırdılar.
Nazirin bu açıqlamasını şərh edən politoloq Elxan Şahinoğlu bildirib ki, deyib ki, Ankara Minsk Qrupu formatından imtina edilməsini lazım bilmir.
"Doğru yanaşmadır. Elə Azərbaycan prezidenti də həmsədrləri tənqid etsə də, bu formatdan imtina etməyi lazım bilmir. Müharibəyə qədər danışıqların getdiyi təxminən 26 ildə həmsədrlərdən tələbimiz o olub ki, Ermənistanın işğalına son qoysunlar, BMT-nin 4 qətnaməsini yerinə yetirsinlər. Etmədilər, 44 günə biz məsələni böyük ölçüdə həll etdik. Ona görə də bundan sonra Minsk Qrupundan artıq heç bir tələbimiz və gözləntimiz yoxdur"-deyə ekspert qeyd edib.
E.Şahinoğlu hesab edir ki, bu formatdan imtina doğru olmazdı, bu halda böyük güclərin təzyiqi ilə üzləşə bilərik:
"Böyük güclər simvolik də olsa rollarını davam etdirmək istəyir, bu yolla oyundankənar vəziyyətdə qalmaq istəmirlər. Həmsədrlərdən imtina bizə lazım deyil. Gəlsinlər, getsinlər, biz isə öz işimizi davam etdirək, onsuz da status məsələsi yaxın illərdə həll olunmayacaq. 25 il heç bir nəticə əldə etməyən qurum qoy bir elə o qədər turistik səfərlərlə məşğul olsun. Əvvəl bu səfərlərin nəticəsiz qalması bizi rahatsız edirdi, indi isə qoy Ermənistanı rahatsız etsin".
