ABŞ anti-Rusiya sanksiyalarını zəiflətməyəcək - Səfir Sallivan
Birləşmiş Ştatlar və onun müttəfiqləri Ukraynadakı və Krım ətrafındakı situasiya ilə bağlı Rusiya əleyhinə sanksiyaları zəiflətmək niyyətində deyil.
Belə bəyanatla «Dojd» telekanalına müsahibəsində Amerika Birləşmiş Ştatlarının (ABŞ) Rusiyadakı səfiri Con Sallivan çıxış edib. O, qeyd edib ki, Ukraynadakı fəaliyyətlə bağlı problem ABŞ administrasiyası üçün prioritet olaraq qalır.
«Həm hakimiyyəin icra qanadı, həm də Konqres ardıcıl olaraq, sərhədlərin qanunlara əməl olunmadan dəyişdirilməsinin yolverilməz olduğunu bəyan edib» - deyə, diplomatik missiyanın başçısı bildirib.
Bu zaman səfir etiraf edib ki, Vaşinqtonun daim tətbiq etdiyi və genişləndirdiyi anti-Rusiya sanksiyaları həm də Birləşmiş Ştatların özü üçün neqativ effekt verir. Səfirin sözlərinə görə, iqtisadi məhdudiyyətlər tez-tez ABŞ iş adamlarının maraqları ilə toqquşur.
Ancaq diplomat qeyd edib ki, hətta Birləşmiş Ştatların işgüzar ictimaiyyəti üçün iqtisadi zərər belə, ABŞ hakimiyyətinin mövqeyini dəyişmək gücündə deyil - onun üçün başlıca tapşırıq geosiyasi məsələdir.
