Azərbaycan hərbçiləri "Bayraktar" təlimlərini başa vurdu - Selçuk Bayraktar sertifikat verdi

Azərbaycan hərbçilərinin bir qrupu “Bayraktar” təlimlərini başa vurdu. 

“Bayraktar TB2” zərbə pilotsuz uçan aparatlarının idarə edilməsi təlimlərini başa vurmuş bir qrup Azərbaycan hərbçisinə bu gün xüsusi sertifikatlar təqdim ediləcək. 

Azsiyasət.com virtualaz.org-a istinadən xəbər verir ki, bu haqda “Bayraktar”ların yaradıcısı, “Baykar Savunma” şirkətinin texniki direktoru Selcuk Bayraktar özünün telegram-kanalında bildirib.

“Azərbaycan Silahlı Qüvvələrinin SİHA (silahlı insansız hava aracı) təlimlərini yekunlaşdırmış hərbçilərinə sertifikatları təqdim etmək üçün SİHA Təlim Mərkəzinə gedirik”, - Selcuk Bayraktar qısa videopaylaşımında deyib.

“Bayraktar TB2” zərbə pilotsuz təyyarəsi Azərbaycan ordusunun 44 günlük ikinci Qarabağ müharibəsində əldə etdiyi parlaq qələbədə mühüm rol oynayan müasir silah sistemlərindən biridir. Bu pilotsuz döyüş təyyarələri Azərbaycan ordusunun silahlanmasına ötən ilin yayında, müharibənin başlanmasından əvvəl daxil edilib. Hədəfə lazerlə yönləndirilən, “Roketsan” şirkətinin istehsal etdiyi  4 ədəd MAM-L və MAM-C raketləri ilə silahlanmış “Bayraktar TB2” hədəfi aşkarladıqdan sonra onu həmin raketlərlə məhv edir. Qarabağ müharibəsi ərzində “Bayraktar”lar düşmənin çoxsaylı hərbi texnikasını, canlı qüvvəsini məhv edib".