"Müdafiə naziri mülki şəxs olmalıdır" - "Hansı “ağıllı” Prezidenti devirməyi ağlından keçirər?..."
BAXCP sədri, millət vəkili Qüdrət Həsənquliyevin müsahibəsini təqdim edirik:
- Qüdrət bəy, orduda bəzi yüksək rütbəli generalların istefaya göndərilməsinə münasibətiniz necədir?
- Ölkəmiz inkişaf edir, yenilənir, dəyişir. Bu dəyişikliklər Ordunu da əhatə etməli idi və bunun anonsunu Prezident 44 günlük Vətən müharibəsi zamanı vermişdi. Mən hər zaman hökuməti Orduda islahatlar aparmağa, Müdafiə Nazirliyinin rəhbərliyini milli kadrlarla gücləndirməyə çağırmışam. Bu gün də əminəm ki, Silahlı Qüvvələrimizi daha güclü etmək üçün Müdafiə naziri mülki şəxs olmalı, peşəkar ordu qurulmalıdır. Ordu üzərində güclü parlament və mülki nəzarəti təşkil etmək lazımdır. Ümumiyyətlə, zamanla ayaqlaşıb, qarşıya qoyulmuş vəzifələri uğurla yerinə yetirə bilməyən kadrlar dəyişdirilməlidir. Amma ona da imkan verilməməlidir ki, kimlərsə yaranmış vəziyyətdən öz dar siyasi məqsədləri üçün istifadə edib bütün məmur təbəqəsini xalqımıza oğru-quldur kimi təqdim etsin. Onların çoxu öz vəzifələrini vicdanla yerinə yetirir. Çox təəssüf ki, 90-cı illərdə partiya-sovet orqanlarında çalışanlar bütövlükdə xalqımıza satqın, rüşvətxor kimi təqdim olunurdu və biz bunun acı nəticələrini yaşadıq.
- Son günlər bəzi şəxslər ölkəmizdə mümkün dövlət çevrilişi barədə danışmağa başlayıblar. Bunun hər hansı əsası varmı?
- Heç bir əsası yoxdur. Güc strukturları, hüquq-mühafizə orqanları Prezidentə və xalqımıza sadiqdir. Xalqımız Prezidenti müdafiə edir və onun qarşımızda duran problemləri həll edəcək islahatları uğurla həyata keçirəcəyinə inanır. Artıq bu istiqamətdə real addımların atılması üçün ciddi hazırlıq işləri görülür. Çevriliş barədə danışanların isə hər birinin öz marağı var. Biri yanlış olaraq düşünür ki, bununla iqtidara kömək edir, eyni zamanda diqqəti özünün təxribatçı əməllərindən yayındırır. Digəri fikirləşir ki, bu yolla iqtidar daxilində parçalanma yarada bilər. Bir başqası bu tipli şayiələr yayıb başqasına etimadsızlıq yaratmaq istəyir. İnkişafın qarşısında kötüyə çevrilmiş başqa biriləri düşünürlər ki, bu tipli şayiələr yaymaqla Prezidenti təhdid edib islahatlardan çəkindirmək olar və s. Amma bu barədə danışanların hər biri ayrılıqda başa düşür ki, Azərbaycanda anti-konstitusion yolla hakimiyyət dəyişikliyi dövrü çoxdan başa çatıb və xalqımız onların dediklərini ciddi qəbul etmir. Bir də hansı “ağıllı” torpaqlarımızın 30 illik işğalına son qoymuş, siyasi reytinqinin pik dövrünü yaşayan Prezidenti devirməyi ağlından keçirər?...
- İnternet üzərindən belə bir təbliğat aparılır ki, Prezident keçmişə ekskurs etməklə AXC və Musavatı tənqid edirsə, bu o deməkdir ki, onları özünə real alternativ kimi görür və onlardan çəkinir. Siz necə düşünürsünüz?
- Prezident çox istəyir ki, məhz onlar Prezidentə qarşı real alternativ kimi görünsünlər. Çünki bərk çığıranların hər biri zaman-zaman bu və digər formada iqtidarla əməkdaşlıq edib və bir çoxu bu gün də edir. Prezident onların “gücünə” və “iradəsinə” yaxından bələddir. Həm də həmin dövr insanların yaddaşında güclü hakimiyyətin olmadığı, torpaqlarımızı itirdiyimiz, dövlət quruculuğunda ciddi uğursuzluqlara düçar olduğumuz silahlı qiyamlar və anarxiya dövrü kimi qalıb. Əlbəttə, Elçibəyin prezidentliyi dövründə bəzi uğurlu qərarlar qəbul olunsa da, ümumən, həmin dövr xalqımızın yaddaşında xaos dövrü kimi assosiasiya olunur. Nəzərə alsaq ki, həmin dövrdə xarici siyasətdə və qonşularla münasibətdə də problemlər mövcud idi, onda hər kəs başa düşməlidir ki, Prezident niyə o dövrə tez-tez müraciət edir. O da etiraf olunmalıdır ki, Prezident istədiyi vaxt siyasi gündəmi dəyişə bilir, həm də bəlli düşərgəyə mövzu verir ki, həftələrlə müzakirə etsin.
