Azərbaycanı bu təşkilatdan niyə qovurdular? - Qubad İbadoğludan ittihamlar
2020-ci ildə həyat sığortası bazarında ödənişlərin 48 faizi, yığımın 33 faizi Paşa Həyatın payına düşüb.
Azsiyasət.com xəbər verir ki, bu sözləri iqtisadçı Qubad İbadoğlu bildirib. O qeyd edib ki, ötən il bank bazarının aktivlərinin 40 faizdən çoxu, depozitlərin 45 faizindən çoxu Paşa Holdinqə məxsus olan Paşa Bank, Kapital Bank və Xalq Bankın payına düşüb:
“Ölkənin selullar mobil operator bazarında cəmi 3 şirkət (Azərcell, Bakcell və Nar Mobile) vardır, Azərbaycana interneti 2 şirkət (Delta Telekom və AzerTelecom) gətirir. Sərnişin nəqliyyatı AZAL-ın, hava ilə yükdaşıma nəqliyyatı isə Silk Way şirkətinin inhisarındadır, pensiyanı yalnız dövlət fondundan ala bilərik. Elektrik enerjisini “Azərişıq”dan, qazı “Azərqaz”dan, suyu “Azərsu”dan, istiliyi “Azəristiliktəchizat”dan alırıq. Alternativ seçim imkanları yoxdur! Qida bazarının yarısına qədəri “Azərsun” və “Veysəloğlu”nun nəzarətindədir. Aqroparkların 9-u Paşa Holdinqə məxsusdur. Məgər, bu inhisarçılıq, hökmranlıq deyil?”
Q.İbadoğlu xatırladıb ki, “Antiinhisar fəaliyyəti haqqında” Qanuna görə, bazarda payı 35 faizdən və ya qanunvericiliklə müəyyən olunmuş digər həddən çox olan təsərrüfat subyekti hökmran mövqe tutan hesab olunur. Ekspert Azərbaycanda şəffaflığın olmadığını da iddia edib:
“Öhdəliklərə əməl etmədiyinə görə Azərbayanı Mədən Sənayesində Şəffaflıq Təşəbbüsündən qovurdular, özü çıxdı. Ölkəmiz Açıq Hökumət Tərəfdaşlığında 3 ildir ki, qeyri-aktiv üzv statusunda qalıb. Dövlət Neft Fonduna gəlincə, 2019-cu ilin sentyabrın 30-da Fonda ünvanladığımız sadə informasiya sorğularına indiyədək cavab ala bilməmişik. “İnformasiya əldə etmək haqqında” Qanuna görə, bu sorğular maksimum 2 həftəyə cavablandırılmalıdır, üstündən 1 il 5 ay keçib, hətta Bakı şəhər 1 saylı İnzibati İqtisad Məhkəməsi də iddiamızı təmin etmədi, qanunu yox, Dövlət Neft Fondunu müdafiə etdi. Martın 18-də Apellyasiya məhkəməsi olacaq. Heç şübhəsiz ki, onlar da qanunu yox, Neft Fondunu müdafiə edəcəklər”.
bakupost.az
