Putin Ərdoğanla görüşmək istəyir - "Ərdoğan Laçın dəhlizi ilə bağlı..."

"Türkiyə və Rusiya dövlət başçıları Rəcəb Tayyib Ərdoğan və Vladimir Putin Mersin vilayətində “Akkuyu” Atom Elektrik Stansiyasının (AES) 3-cü blokunun təməlqoyma mərasiminə onlayn formatda qatılıblar. Cumhuriyyətin quruluşunun yüz illiyinə təsadüf edəcək stansiyanın işə başlaması Türkiyənin elektrikə olan tələbatının 10 faizini ödəyəcək. Bu Türkiyə üçün kifayət qədər böyük rəqəmdir".

Azsiyasət.com xəbər verir ki, bunu "Atlas" Araşdırmalar Mərkəzinin rəhbəri, politoloq Elxan Şahinoğlu qeyd edib.

Politoloqun sözlərinə görə, Putinin türkiyəli həmkarıyla üzbəüz görüşə ehtiyacı var:

"Prezidentlər onlayn görüş zamanı yaxın müddətdə əyani görüşəcəklərini də elan ediblər. Vladimir Putin uzun müddətdir türkiyəli həmkarı ilə görüşmədiyini vurğulayaraq bu cümləni işlədib: “Görüşü yaxın vaxtlarda reallaşdırmaq lazımdır”. Demək, Putinin türkiyəli həmkarıyla üzbəüz görüşə ehtiyacı var. Putin Ərdoğanın simasında özünə yaxın tərəfdaş tapıb. Rusiya tarixində ilk dəfə olaraq NATO-ya üzv olan ölkəyə müasir raketlər satıb, boru xətləri inşa edib və nəhayət tərəfdaşının ərazisində atom elektrik stansiyasının tikintisini davam etdirir".

"Bundan başqa iki dövlət Suriya, Liviya və Azərbaycanın ərazisi olan Dağlıq Qarabağda əməkdaşlıq edirlər. Bu bizim üçün də əhəmiyyətlidir. Çünki Rusiya hərbçilərinin Dağlıq Qarabağdakı fəaliyyətlərləri ilə bağlı suallarımız var, üstəgəl Laçın dəhlizi üzərindən sərhəddin nəzarətə götürülməsi vacibdir. Ərdoğanın bu məsələləri də Putinlə müzakirə edəcəyi ehtimalı yüksəkdir. Əsas odur ki, Putin Ərdoğanın Qarabağla bağlı nəvbəti təkliflərinə “yox” deməsin. Digər tərəfdən ümid edirik ki, Bakı ilə Ankara arasında təkliflərlə bağlı ortaq çalışma var", - deyə E.Şahinoğlu fikrini tamamlayıb.