Döyüşmək üçün Türkiyədən Qarabağa gəldi - Erməni nəşrindən skandal etiraf

Ovanes Mkrtçyan adlı Türkiyə vətəndaşı Qarabağdakı 44 günlük müharibədə Ermənistan ordusunun sıralarında döyüşüb.

Azsiyasət.com teleqraf.com-a istinadən verir ki, bu barədə Mkrtçyan “Sputnik Ermənistan”a danışıb. O, Türkiyədəki həmşinli ermənilərindən olduğunu bildirib. Mənbə Mkrtçyanı “Qərbi Ermənistandan olan könüllü” kimi təqdim edib.

Məlumatda qeyd olunub ki, Ovanes Mkrtçyan ötən il film çəkmək üçün Ermənistana gəlsə də, planları əvvəlcə koronavirus, sonra da Qarabağdakı 44 günlük müharibə səbəbindən pozulub. O, bundan sonra “könüllü” şəkildə erməni ordusunun sıraların qatılmaq qərarı verib.

İddiasına görə, müharibə vaxtı Qarabağa getmək istəsə də, Ermənistan vətəndaşlığı olmadığı üçün rədd edilib:

“Bir dostuma dedim ki, cəbhəyə getmək üçün gözləməyimiz lazım deyil, özümüz getməliyik. Ertəsi gün gediş təşkil etməyi bacardıq. Forma alıb saat 7-də getdik. Dəstədə müxtəlif ölkələrdən kömək üçün gəlmiş könüllülər vardı”.

Qeyd edək ki, müharibə vaxtı Ermənistan ordusunun sıralarında xarici ölkə vətəndaşlarının “könüllü” qismində Azərbaycana qarşı döyüşdüyü məlumdur. Bura Livan, İran, Fransa, ABŞ və digər ölkələrin erməni əsilli vətəndaşları daxildir. Artıq Fransada bununla bağlı cinayət işi açılıb.

Əlavə edək ki, ermənilər Türkiyənin Şərqi Anadolu bölgəsini “Qərbi Ermənistan” adlandırırlar və özlərinin “tarixi vətəni” hesab edirlər. Həmşin (Akçakoca) isə Türkiyənin Qara dəniz bölgəsində yerləşən bir mahaldır.