Natiq Cəfərli: "Onlar partiyalarının bayrağını satmağa hazırdırlar"
"SSRİ-nin saxlanılması ilə bağlı keçirilən referendumdan düz 30 il keçir. 17 mart 1991-ci ildə SSRİ-nin son çırpıntısı olaraq referendum keçirildi. Baltikyanı respublikalar, Moldova, Gürcüstan və Ermənistan referendumun keçirilməsindən imtina etdilər. Azərbaycan rəhbərliyi isə həm canla-başla referenduma getdilər, həm də 1990-cı il Qanlı Yanvar hadisələrindən sonra milləti heçə sayaraq Kremlə baş əymək üçün növbəyə durdular, guya seçicilərin 75,1 faizi iştirak etdi, guya 93,3 faiz SSRİ-nin saxlanılmasına səs verdi. O zamankı Azərbaycan rəhbərliyi xalqı aşağıladı”.
Azsiyasət.com xəbər verir ki, bu sözləri REAL Partiyasının sədr müavini Natiq Cəfərli deyib.
“Amma tarix öz sözünü dedi, çürümüş, təməli olmayan, repressiv aparat üzərinə inşa edilən “xalqların həbsxanası” çökdü, SSRİ dağıldı. SSRİ-nin dağılması elan edilən 25 dekabr 1991-ci ildə Kremldə mətbuat konfransı keçirilirdi. Tədbirə xarici jurnalistlər də dəvət almışdılar. Tədbir bitir, saat 19:25-də CNN jurnalistləri Kremldən çıxanda görürlər ki, bir nəfər fəhlə baba SSRİ-nin bayrağını Kreml üzərindən endirir. Həmin prosesi lentə alırlar, bayrağı Kremldən endirən adamdan müsahibə almaq istəyirlər. Fəhlə baba müsahibə verməkdən imtina edir, o zaman CNN-nin jurnalisti həmin bayrağı ondan almaq istəyir, 12 dollar pul təklif edir. Fəhlə baba razılaşır, indi həmin bayraq Vaşinqtondadır. Amma bu hadisənin çox böyük simvolik əhəmiyyəti də var, SSRİ guya fəhlə-kəndli hakimiyyəti idi, amma ideoloji təməli o qədər qeyri-sağlam idi ki, Kremldən rəsmi bayrağı endirən fəhlə, o bayrağı öpüb saxlamaqdansa, onu 12 dollara satmağa üstünlük verdi”,-deyə siyasətçi əlavə edib.
Natiq Cəfərli müasir Azərbaycanda da az şeyin dəyişdiyini vurğulayıb:
“Yenə seçki insititutu yox, yenə ideoloji təməli olmayan siyasi təşkilatlar, yenə dəyərləri, prinsipləri olmayan partiyaların “bayrağını” pula satmağa hazır olan bəzi tərəfdarlar. İşimiz çətindir, amma şərəflidir, ölkədə prinsiplər və dəyərlər üzərinə, ideoloji təmələ söykənən örnək partiya qurmaq, inkişaf etdirmək işi bizim boynumuzun borcudur. YAP klassik anlamda partiya deyil, klassik siyasi təşkilatlarının böyük bir qismi isə şəxsə bağlı populist sektalardır”.
