XİN-in həbs edilən idarə müdiri Ramiz Həsənova tabe olub - Nazir müavini niyə yalan danışır? - ARAŞDIRMA - FOTO
Dünən Xarici İşlər Nazirinin iki müavini – Ramiz Həsənov və Nadir Hüseynovun XİN-də baş verən qanunsuzluqlarla bağlı DTX-ya çağrılaraq ifadələrinin alınması barədə məlumatlar yayıldı.
Bundan dərhal sonra R.Həsənov mətbuata açıqlama verərək istintaqa çağrılmadığını, heç yerdə ifadə vermədiyini bildirdi. R.Həsənovun bununla bağlı açıqlamasında maraqlı bir məqam var. O qeyd edir: “Ümumiyyətlə, mənim fəaliyyət sahəm (XİN-dki fəaliyyətini nəzərədə tutur – S.F.) tamam başqadır. Mətbuat bu cür məlumatları tirajlayarkən dəqiqləşdirmə aparmalıdır”.
“Azsiyasət.com” analitik-informasiya saytı olaraq məsələnin aktuallığını nəzərə alıb, R.Həsənovun nazir müavini kimi fəaliyyət istiqamətlərini araşdırmalı olduq. R.Həsənov “mənim fəaliyyət sahəm tamam başqadır” deməklə əslində nəyi nəzərdə tutur? Həqiqətənmi R.Həsənov XİN-də baş verən qanunsuzluqlarla heç bir əlaqəsi ola bilməzdi?
Məlum oldu ki, R.Həsənovun XİN rəhbərinin müavini kimi birbaşa nəzarət elədiyi sahələr bunlardır: “İkinci Avropa İdarəsi”, Xüsusi şöbə”, “İşlər idarəsi”, “Ümumi katiblik”, “Nazirliyin inspeksiyası”, “Asiya idarəsi”, Amerika idarəsi”, “YUNESKO üzrə Daimi Komissiyanın katibliyi”, “Yaxın Şərq və Afrika idarəsi”.
Məlumat üçün bildirək ki, R.Həsənov nazir müavini kimi 9 idarəyə nəzarət edir, bu idarələr birbaşa onun kurasiyasındadır.
Digər nazir müavinlərinin nəzarətində olan idarələrin sayı 3-5 arasında dəyişir. Məsələn, nazirlikdə 5 idarə N.Hüseynovun nəzarətinə verilib: “Konsulluq idarəsi”, “Arxiv idarəsi”, “Linqvistik təminat idarəsi”, “Xüsusi rabitə təminatı idarəsi”.
Göründüyü kimi, iyulun 3-də DTX-nın həbs etdiyi XİN-in İşlər İdarəsinin müdiri Fərhad Mollazadə birbaşa R.Həsənova tabe olub. R.Həsənovun nəzarət elədiyi, birbaşa məsuliyyət daşıdığı 9 idarədən biri də məhz İşlər İdarəsi olub. Bu barədə XİN-nin rəsmi saytında da məlumatlar yer alıb.
Eyni zamanda, DTX-nın həbs etdiyi Konsulluq İdarəsinin müdiri Faiq Bağırov isə N.Hüseynovun kurasiyasında olub.
Bu faktlardan belə çelə çıxır ki, R.Həsənov və N.Hüseynovun DTX-ya çağrılması barədə yayılan məlumatlar doğrudur, sadəcə R.Həsənov yalan danışmaqla məsələni bitmiş hesab edib.
Etibarlı mənbələrdən əldə etdiyimiz məlumata görə, R.Həsənov XİN-də baş verən bütün qanunsuzluqlara görə məsuliyyət daşımalı olan əsas 2 şəxsdən (keçmiş nazir E.Məmmədyarov və o) biridir. O, “Xüsusi şöbə” də daxil olmaqla, ən strateji idarələrə rəhbərlik edir.
Ona görə də, onun məsuliyyətdən yayınması mümkünsüzdür. Hesab edirik ki, nə F.Mollazadə, nə də F.Bağırov tabe olduqları şəxslərin – R.Həsənov və N.Hüseynovun xəbəri olmadan nazirlikdə qanunsuzlluqlara yola verə bilməzdilər. Özü də uzun illər boyu.
Bütün bunlar R.Həsənovun DTX-ya çağrılması barədə yayılan məlumatların doğru olması barədə ehtimalları daha da artırır. Bu istiqamətdə araşdırmalarımızı davam etdirəcəyik.
Xatırladaq ki, DTX iyul ayının 3-də XİN-də əməliyyat keçirərək nazirliyin İşlər İdarəsinin müdiri Fərhad Mollazadə və Konsulluq İdarəsinin rəisi Faiq Bağırov da daxil olmaqla bir neçə əməkdaşını həbs edib.
Samir FEYRUZOV
