"Rusiya Azərbaycan icmasının Xankəndidə ofis açmasına mane ola bilməz, çünki...
"Xankəndidə Azərbaycan parlamentinin həmin şəhər üzrə deputatının, eyni zamanda Qarabağın Azərbaycanlı icmasının rəhbərinin ofisinin yaradılması məsələsinin həlli kifayət qədər realdır. Çünki buna Rusiya da qarşı çıxa bilməz. Və hesab edirəm ki, buna beynəlxalq dəstək də əldə etmək asandır. Ona görə ki, əgər məqsəd sülh, barışıq əldə etməkdirsə, icmalar arasında ünsiyyət, kontakt yaratmaqdırsa, buna hər hansı ölkə və ya beynəlxalq təşkilat tərəfindən əngəl yaradılması da qəbulolunmazdır...”
Azsiyasət.com xəbər verir ki, bu fikirləri politoloq Sülhəddin Əkbər Qarabağın Azərbaycanlı İcması İctimai Birliyinin sədri, Xankəndinin deputatı Tural Gəncəliyevin Xankəndidə ofis binası axtardığına dair açıqlamasına və Ermənistanın, eləcə də Qarabağdakı separatçı xuntanın buna reaksiyasına münasibət bildirərkən söyləyib.
“Müharibədən əvvəl də beynəlxalq təşkilatlar daim hay qaldırırdılar ki, Qarabağdakı Azərbaycan və erməni icmaları arasında əlaqələr, münasibətlər qurulmalıdır. Bunun da ən real yolu Qarabağdakı Azərbaycan icmasının rəhbərinin, ardınca da şərait yarandıqca müharibə zamanı oradan köçkün düşmüş soydaşlarımızın Xankəndidə yerləşməsidir”.
S.Əkbər “Hələlik Yuxarı Qarabağ tam Azərbaycanın yurisdiksiyasına keçənədək Xankəndindəki nümayəndəliyimizin təhlükəsizliyi necə təmin olunmalıdır” sualını da cavablandırıb.
“Azərbaycan icma rəhbərinin və onun başçılığıyla yaradılacaq nümayəndəliyin təhlükəsizliyini yalnız Rusiya hərbçilərinə etibar etmək olmaz. Burada Azərbaycan və Türkiyənin də iştirakı vacibdir. Yeri gəlmişkən, bir məsələni vurğulayım ki, bizim məcburi köçkün soydaşlarımızın Xankəndi ilə yanaşı, Dağlıq Qarabağ və Laçın dəhlizi ətrafındakı ərazilərə köçürülməsi başlanan kimi onların təhlükəsizliyi məsələsini həll etməliyik. Bunu yalnız Rusiya ordusuna həvalə etməməliyik. Həmin ərazilərdə daimi yaşayacaq vətəndaşlarımızın təhlükəsizliyinin təminatında Azərbaycan və Türkliyə hərbçiləri də mütləq iştirak etməlidir”- deyə politoloq vurğulayıb./Moderator.az
