ABŞ Rusiyaya tətbiq edilən sanksiyalardan məmnundur: "İş planlaşdırılan nəticəyə doğru gedir"

ABŞ prezidenti Co Baydenin milli təhlükəsizlik məsələləri üzrə müşavirinin müavini Dalip Sinq Rusiya hakimiyyətinə qarşı bu ilin aprel ayının 15-dən bu yana qəbul edilən bütün sanksiyaların göstərdiyi nəticədən məmnun olduqlarını açıqlayıb.

Dalip Sinqh bununla Ağ Evin istədiyi nəticəyə yaxın olduğunu qeyd edib. Onun sözlərinə görə, ABŞ “proporsional surətdə və məqsədyönlü şəkildə hərəkət edərək” Rusiyaya böyük zərər verə biləcəyini göstərmiş olub.

Müşavirin fikrincə, antirusiya sanksiyaları diplomatik proses üçün rıçaqların yaradılması yolunda bir strategiya vasitəsidir. “Rusiya ilə bağlı olaraq, bu prosesin əsas hədəfi daha sabit və öngörülən münasbətlərin qurulmasından ibarətdir”,- deyə o, söyləyib.

Xatırladaq ki, bu ilin aprel ayının 15-dən Birləşmiş Ştatlar Rusiyanın 32 hüquqi və fiziki şəxsinə sanksiya tətbiq edib. İyun ayının 15-dən sonra ABŞ-ın maliyyə şirkətləri Rusiyanın dövlət istiqrazlarını almaq hüququndan məhrum ediləcək. Rəsmi Vaşinqton həmçinin Rusiya səfirliyində çalışan 10 diplomatını ölkədən qovub.

Bu gün isə Rusiyanın ABŞ-dakı müvəqqəti işlər vəkili Sergey Koşelyov Dövlət Departamentinə çağrılıb və ona Birləşmiş Ştatların Çexiyaya tam dəstək verdiyi, Moskvanın bölgədə sabitliyi pozan hərəkətlərindən narahat olduqları çatdırılıb.