Hüseynbala Mirələmov getdi, bəs dostları? - Həbslər olacaq...
Yeni Azərbaycan Partiyasında (YAP) baş verən son dəyişikliklər - qurultayın keçirilməsi, illərlə partiyanı şəxsi mənfəət yuvasına çevirən şəxslərin mövqeyinin zəiflədilməsi, yaxud proseslərdən tamamilə kənarda saxlanılması ciddi və zəruri addımlar idi.
Xüsusilə də, indiyə qədər məmur və siyasi reputasiyası şəffaf olan Tahir Budaqovun YAP rəhbərliyində mühüm posta gətirilməsi böyük ümidlər yaradıb.
Bununla belə, YAP-da dəyişikliklərin aparılması tarixi zərurətə çevrilib. YAP mərkəzi aparatında, rayon təşkilatlarında ciddi islahatların aparılması vacibdir və bu, ümumən Prezident İlham Əliyevin ölkədə bütün sahələr üzrə apardığı köklü islahatların tərkib hissəsi qismində çıxış etməlidir.
YAP Xətayi rayon təşkilatının sədri Hüseynbala Mirələmovla bağlı məlum video-görüntülərin yayılması sübut edir ki, hakim partiyada köhnə komanda üzvləri bir “xərçəng şişi” kimi ölkənin sağlam siyasi elitasını və dövlət başçısının gələcəyə hesablanmış addımlarını məqsədli şəkildə ləkələmək üçün səfərbər olunublar. Bu, hakikm partiyaya olan inamsızlığı artırmaq, xalqın YAP-a olan etimadına zərbə vurmaq məqsədi daşıyır.
YAP-da H.Mirələmovla eyni düşüncə və əxlaqda olan şəxslər çoxdur. Xüsusilə də, onun dostları, müxtəlif regionlar üzrə rayon təşkilat sədrləri, uzun illərdir YAP-ı şəxsi həyat komfortuna çevirən şəxslər təxirsalınmaz addımlar nəticəsində partiyadan qovulmalıdırlar.
YAP Səbail rayon təşkilatının sədri Şəmsəddin Hacıyev və Nərimanov rayon təşkilatının sədri Təmraz Tağıyevin fəaliyyətinin yoxlanılaraq partiyadan qovulmaları olduqca mühüm məsələdir.
21 ildir 2 saylı Doğum evinin baş həkimi vəzifəsində işləyən (bu günə qədər), 14 ildir YAP Sabunçu rayon təşkilatına rəhbərlik edən Mehriban Abasquliyeva, YAP Binəqədi rayon təşkilatının sədri Ramiz Göyüşov və YAP Suraxanı rayon təşkilatının sədri Vüqar Seyidovun qanunsuz əməlləri barədə yerli mətbuatda dəfələrlə materiallar yayımlanıb. Bu, şəxslərin Heydər Əliyev kimi fenomanel tarixi şəxsiyyətin, böyük ideoloqun yaratdığı partiyanın “vitrin”ində təmsil olunmağa haqları yoxdur.
Necə ki, H.Mirələmov öz timsalında bunu sübut etdi.
YAP-ın mərkəzi aparatında və rayon təşkilarında həbslərin həyata keçiriləcəyi ilə bağlı məlumatlar da yayılmaqdadır. İnanırıq və əmin edirik ki, əgər araşdırmalar başlasa, YAP-da çox böyük yeyintilər, miqyası daha böyük olan qanunsuzluqlar, korrupsiya əməlləri ortyaya çıxacaq.
Hesab edirik ki, YAP ölkədəki islahatlar kursundan kənarda qalmamalıdır. Hakim partiyada ciddi islahatların aparılması Prezidentə böyük dəstək olardı.
Azsiyasət.com
Samir
