"Dqr"i qəfildən tanıyıb, bizi fakt qarşısında qoysalar... - REAL sədri
Ermənistandan qovulan vətəndaşların yaratdığı və "mühacirətdə hökumət" adlandırdığı qurumlarla Azərbaycan özünün Xarici İşlər Nazirliyi və dövlətin digər səviyyələrində açıq təmaslara başlamalıdır - rəsmi İrəvan hələ də "dqr" ilə bu cür təmasda olduğu kimi.
Azsiyasət.com xəbər verir ki, bunu REAL sədri İlqar Məmmədov yazıb. O bildirib ki, dünya dövlətlərinin bəzilərinin davranışları narahatlıq üçün ciddi əsas yaradır:
“Şərqli-qərbli bir sıra nüfuzlu dövlətin davranışına baxıb belə bir ehtimal qura bilərik ki, o qədər də uzaq olmayan perspektivdə onlar eyni anda, bir yerdə və gözlənilmədən "dqr"i tanıyıb Azərbaycanı fakt qarşısında qoya bilərlər.
2008-ci ilin fevralında Kosovanın bir həftə içində kütləvi tanınması ssenarisi bu dəfə gizli beynəlxalq əlaqələndirmə nəticəsində Qarabağın dağlıq hissəsinə də aid edilsə, buna verə biləcəyimiz ən təsirli cavab Zəngəzurun dövlətini, hökumətini, ordusunu, rəmzlərini tanımaqdır. Ən azından buna hərtərəfli hazır olmağımız sözügedən dövlətləri belə əməldən çəkindirə bilər.
Ermənistanın dostu, Türkiyənin strateji rəqibi, Azərbaycanı isə “tarixi təsadüf” hesab edən o dövlətlərin adlarını hazırda çəkmək istəmirəm. Prezident Əliyevin bir neçə dəfə Qərbi Zəngəzur haqda çıxışlar etməsi yetərli deyil. Rəsmi təmasların başlanılması həmin çıxışlardan daha faydalı və təsirli olardı”.
