"Sarqsyan Azərbaycana Dağlıq Qarabağın yarısını təklif edirdi" - Paşinyan

Ermənistanın keçmiş prezidenti Serj Sarqsyan vaxtilə Dağlıq Qarabağ ərazisini yarısına qədər Azərbaycana güzəştə getməyə hazır idi.

Azsiyasət.com “Sputnik Armeniya”ya istinadən bildirir ki, bunu Ermənistanın baş naziri vəzifəsini icra edən Nikol Paşinyan parlamentdə hökumət saatı zamanı deyib.

Nəşr yazır ki, Paşinyan Sarqsyanın 2016-cı ilin noyabrında "Rusiya bu gün" agentliyinə verdiyi müsahibəni xatırladıb.

"Sarqsyan deyir ki, onlar Azərbaycana 7 rayonu təhvil verməyə hazır idilər. Amma Azərbaycan daha çox tələb edirdi. Sarqsyan hər dəfə Azərbaycanın yeni tələblər irəli sürdüyünü deyir. Mən sizə daha artığını deyəcəyəm – Serj Sarqsyan Azərbaycana daha çox, hətta Qarabağın yarısına qədərini verirdi, amma Azərbaycan "yox" dedi", - Paşinyan bəyan edib.

O, Robert Koçaryanı və Serj Sarqsyanı Dağlıq Qarabağı öz şəxsi maraqları naminə "satmış" satqınlar adlandırıb: "Robert Koçaryan və Serj Sarqsyan, siz vətən xainlərisiniz! Biz sizin satqınlığınızla mübarizə apardıq. Siz hətta müharibə zamanı da öz xəyanətinizi davam etdirdiniz".

Paşinyanın sözlərinə görə, keçmiş səlahiyyətlilər ermənilərə genetik səviyyədə müharibə qorxusu aşılayıblar. O, Sarqsyanın “pis danışıqlar həmişə yaxşı müharibədən daha yaxşıdır” ifadəsini xatırladıb.

Paşinyan Koçaryanı və Sarqsyanı ordunu müharibəyə hazırlamamaqda da ittiham edib, Koçaryanı isə üstəlik 1998-ci ildə "Qarabağı danışıqlar prosesindən kənara atmaqda" günahlandırıb.

Paşinyanın fikrincə, Qarabağ münaqişəsinin həlli ilə bağlı danışıqları məhz əvvəlki hakimiyyət dalana dirəmişdi və bunun nəticəsində də Azərbaycanla müharibə qaçılmaz oldu...