"Naxçıvana çəkiləcək yollardan biri Qaragölün yaxınlığından keçəcək" - Erməni mətbuatı
Son zamanlar Azərbaycan-Ermənistan sərhədindəki gərginlikdə Qaragöl ətrafında baş verənlər xüsusi yer tutur. Bu ərazinin əhəmiyyətilə bağlı Ermənistan mətbuatında müəyyən iddialar səsləndirilir.
Azsiyasət.com xəbər verir ki, Ermənistanın “Qraparak” qəzeti öz mənbələrinə istinadla Qaragöl ərazisində baş verənlərlə bağlı məlumat yayıb. Məlumatda deyilir ki, Azərbaycanın bu əraziyə xüsusi önəm verməsi təsadüfi deyil:
“Yollardan, yaxud dəhlizlərdən biri Meğridən deyil, Sünikin (Zəngəzur-red.) yuxarı hissəsindən, Qaragölün yaxınlığından keçəcək. Bununla əlaqədar olaraq, Qaragöl Azərbaycan Silahlı Qüvvələrinin hücumunun ilk hədəflərindən biri olub və orada minədək Azərbaycan hərbçisi yerləşdirilib... Azərbaycan tərəfi artıq həmin dəhlizin tikintisinə başlayıb, Qaragöl istiqamətində torpaq yol çəkib və ümid edir ki, həmin yolun davamı da olacaq. Bizim hərbçilər deyirlər ki, hərdən azərbaycanlılarla əlaqə saxlayırlar. Onlardan soruşanda ki, nə üçün gəlmisiniz, “biz əmri yerinə yetiririk, bu, sizin və bizim liderlərin razılaşmasının nəticəsidir”,- deyə, cavab verirlər.
