Avropa Parlamentindən Azərbaycana qarşı növbəti qərəz - Bakıdan sərt reaksiyalar

Mayın 21-də axşam saatlarında Avropa Parlamenti erməni diversantları ilə bağlı qətnamə qəbul edib. Bakıdan onların qeyd-şərtsiz azad edilməsi tələb edilir. Ermənilər bu qərarın ardından sevinclərini gizlətməyiblər və gələn reaksiyalar bunu göstərir. Azərbaycanda isə bu qətnamə sərt reaksiyalar doğurub.

Xatırladaq ki, mayın 20-də diversantların işinin məhkəməyə göndərildiyi barədə xəbərlər yayılıb. Bu xəbərlərin yayılmasının ardından belə qətnamənin qəbul edilməsi təsadüfi sayılmır.

AĞ Partiya başqanı Tural Abbaslı qərara sərt reaksiya sərgilədi: “Düşünürəm ki, Avropa Parlamenti qərəzli, birtərəfli, araşdırılmamış qeyri-obyektiv qərar qəbul edib. Burada birbaşa erməni təəssübkeşliyi hiss olunur. Azərbaycan öz mövqeyindən qətiyyən geri çəkilməməlidir. Avropa Parlamenti hazırda ölkəmizə qarşı siyasi şantajla məşğuldur. Onların əsas məqsədi Azərbaycanı haqlı mövqeyindən geri çəkdirməkdir. Bu yolla Azərbaycan qarşısında zəifləmiş Ermənistanın mövqelərini nisbətən ölkəmizlə eyniləşdirmək istəyirlər. Eyni sualı verə bilərəm ki, Avropa Parlamenti indiyə qədər 800 mindən artıq insanın məcburi köçkün olması ilə bağlı niyə qərar qəbul etməyib? Hələ də niyə minalanmış ərazilərin xəritələrini Ermənistandan tələb etmir? Xankəndi və digər ərazilərimizə azərbaycanlıların qaytarılması tələbi niyə yoxdur? Qərbi Azərbaycandan qovulmuş azərbaycanlıların geri qaytarılması nə üçün tələb olunmur?

Tural Abbaslı: “Avropa Parlamenti hazırda ölkəmizə qarşı siyasi şantajla məşğuldur”

Hazırda da erməni tərəfdə əsirlərimiz var. Onların azad olunmaları barədə indiyə qədər neçə qərar qəbul ediblər? Bütün bunlar onu göstərir ki, Avropa institutları qərəzlidir. Azərbaycanın haqlı mövqeyinə qarşı Ermənistanı gücləndirmək niyyətindədirlər. Rəsmi Bakı qətiyyən bu qərarları ciddiyə almamalıdır. Avropa konkret seçim etməlidir. Ya terrorçu Ermənistanın yanında durmalıdır, ya da Qarabağ konfliktində haqlı mövqeyi olan Azərbaycanın yanında yer almalıdırlar. Düşünürəm ki, Azərbaycan Avropa Birliyinə bu mesajı verməlidir. Rəsmi Bakı hər zaman enerji təhlükəsizliyi və digər əməkdaşlıq məsələlərində Ermənistandan daha sadiqdir. Avropa bunu bir daha nəzərdən keçirib, qiymətləndirməlidir”.

Asim Mollazadə: “Bu qərarın heç bir hüquqi əsası yoxdur”

Demokratik İslahatlar Partiyasının sədri, deputat Asim Mollazadə qərarın heç bir hüquqi əsasının olmadığını söylədi: “Avropa Parlamentində erməni diasporuna sıx bağlı olan, ”səlib yürüşləri" təfəkküründə olan qrup Ermənistana dəstək verir. Onlar anti-İslam mövqeyindən çıxış edir, beynəlxalq hüquq normalarına əməl etmirlər. Bu da çox təəssüf doğurur. Ümidvaram ki, onların mövqeləri Azərbaycanla Avropa Birliyi arasında olan uğurlu əməkdaşlığa maneçilik törətməyəcək. Bu sadəcə olaraq erməni diasporuna xidmət edən qüvvələrin təşəbbüsüdür. Bu qərarın heç bir hüquqi əsası yoxdur. Parlamentin mayın 20-də keçirilən iclasında bu məsələ ətrafında müəyyən müzakirələr getdi, etiraz ifadə edən çıxışlar oldu. Hər kəsə bəllidir ki, bu sənəd həm də Azərbaycanla Avropa Birliyi arasındakı isti münasibətlərə xələl gətirmək istəyən qüvvələrin niyyəti altında qəbul olunub".

Qulamhüseyn Əlibəyli: “Milli Məclis səviyyəsində etiraz bildirilə bilər”

Aydınlar Partiyasının sədri Qulamhüseyn Əlibəyli də eyni cür düşünür: “Avropa Parlamentinin bu qərarının heç bir hüquqi və siyasi əsası yoxdur. Çünki Avropa Parlamenti bir sıra dövlətləri birləşdirir və həmin dövlətlər üçün məcburi sayılan qərarlar qəbul edə bilir. Azərbaycan Avropa İttifaqı ilə əməkdaşlıq edir. Bu baxımdan Avropa Parlamentinin qərarları Azərbaycan üçün məcburiyyət xarakterli ola bilməz. Sadəcə olaraq bu tövsiyə xarakterli qətnamədir. Dediyim kimi, heç bir təsir gücü yoxdur. Rəsmi Bakı o qətnaməyə əhəmiyyət verməyə də bilər. Hesab edirəm ki, elə əhəmiyyət də vermək lazım deyil. Həmin şəxslər müharibədən sonra Azərbaycan ərazisində tutulublar. Ona görə də mühakimə olunmalıdırlar. Azərbaycanın müharibədəki qələbəsi, uğurları bir çox Avropa ölkələrini, strukturlarını ciddi şəkildə narahat edir. Azərbaycanın dünya siyasətində, o cümlədən, Yaxın Şərq siyasətində aparıcı bir dövlətə çevrildiyi bir daha təsdiqlənir. Hesab edirəm ki, Milli Məclis səviyyəsində etiraz bildirilə bilər. Siyasi qüvvələrin də etiraz bəyanatı verməsi mümkündür. Amma xüsusi diqqət yetirmək lazım deyil”.

Məsələyə Azərbaycan Xarici İşlər Nazirliyinin münasibətini öyrənə bilmədik. Nazirliyin mətbuat xidmətindən telefonumuzu açan olmadı.

Musavat.com