Təhlükəsizlik Şurasının iclasından sonra nə baş verəcək? - Paşinyanın sürpriz ideyası

Ermənistanda Təhlükəsizlik Şurasının mayın 27-də keçirilən iclasının bəzi təfərrüatları mətbuata sızıb.

Azsiyasət.com xəbər verir ki, “Hraparak” (“Meydan”) qəzeti iclasda baş nazirin səlahiyyətlərini icra edən Nikol Paşinyanın Azərbaycan-Emənistan sərhədindəki vəziyyətin “partlayış təhlükəli olduğunu” bildirib. Və eskalasiyanı istisna etməyib.

Paşinyan Azərbaycan-Ermənistan sərhədində ATƏT-in Minsk Qrupunun həmsədri olan ölkələrin, yəni ABŞ, Fransa və Rusiyanın hərbi müşahidəçilərinin yerləşdirilməsinə, əvəzində hər iki tərəfin öz qoşunlarını bir neçə kilometr geri çəkməsinə dair iclasdan əvvəl açıqladığı sürpriz ideyanı da vəziyyətin təhlükəli olması ilə əsaslandırıb. Deyib ki, bu təklif “hər iki tərəf üçün faydalıdır”.

“O deməyib ki, Azərbaycan bu təkliflə razıdır, ya yox, təklif strateji müttəfiqlə müzakirə edilibmi. İştirakçılar bu iclasdan bir neçə saat sonra xarici işlər naziri Ara Ayvazyanın istefa verdiyini eşidəndə çox təəcübləniblər. Çünki iclas zamanı Paşinyan bir neçə dəfə deyib ki, nazirə bu təkliflə bağlı tapşırıqlar verib. Ayvazyan da başını tərpətməklə razılıq bildirib. İclas iştirakçıları təxmin edirlər ki, müzakirələrin başa çatmasından sonra nəsə başqa hadisələr baş verib və nazir bu addımı atmalı olub”,-qəzet yazır.

Qeyd edək ki, Paşinyanın təklifinə Minsk Qrupunun həmsədr ölkələri hələ reaksiya verməyiblər. Yalnız Avropa İttifaqı təklifi alqışladığını bildirib. Azərbaycana gəldikdə isə rəsmi Bakı da Paşinyanın təkifinə reaksiya verməyib, amma çətin ki, sərhəddən qoşunların bir neçə kilometr geri çəkilməsi və orada həmsədr ölkələrdən hərbi müşahidəçilərin yerləşdirilməsi ideyası Bakıda ciddi qəbul olunardı. Azərbaycan hazırda Laçın və Kəlbəcər istiqamətində özünün beynəlxalq səviyyədə tanınmış sərhədlərinin bərpası ilə məşğuldur. Sərhəddə xarici ölkələrin hərbi ünsürlərinin yerləşdirilməsinə Azərbaycanın heç bir ehtiyacı yoxdur və bu baxımdan rəsmi Bakı Paşinyanın bu təklifin ciddi saymır.