"Protaseviç MKİ-nin agentidir" - Rus politoloq

“Rusiyanın hadisəyə münasibəti gözlənildiyi kimi olacaq: məsələ Belarusun daxili işidir və terroristi zərərsizləşdirmək hər bir dövlətin vəzifəsidir”.

Azsiyasət.com xəbər verir ki, bunu rusiyalı politoloq, Geopolitik Ekspertizalar Mərkəzinin direktoru Valeri Korovin “Rossiya24” kanalına müsahibəsində Belarusda məlum təyyarə insidenti və həbslərlə bağlı Rusiyanın rəsmi mövqeyi barədə öz fikrini bildirərkən deyib.

O qeyd edib ki, Rusiyanın hadisəyə reaksiyası tamamilə adekvat və məntiqə uyğundur.

“Düşünürəm ki, bu məsələ Belarusun daxili işidir. Qoy məsələnin araşdırılması ilə Belarusun, Latviya və Litvanın aviasiya qurumları, aviadaşımalara cavabdeh olan təşkilatları məşğul olsunlar. Daha doğrusu, bu reaksiya Rusiyanın belə hadisələr baş verən zaman həmişə bildirdiyi tipik, standart reaksiyadır.”

“Avropa dövlətlərinin reaksiyası haqqında isə bunu demək olmaz. Onların reaksiyası siyasidir, həmin dövlətlərin rəhbərlərinin ABŞ-a sadiqliyinə və ABŞ-ın geopolitik layihələrinin həyata keçirilməsi prioritetinə əsaslanıb. ABŞ-ın Mərkəzi Kəşfiyyat İdarəsi Belarusdakı daxili vəziyyətə aktiv müdaxilə etməklə öz agenti Protaseviç vasitəsilə ölkənin konstitusion quruluşuna qəsd edir. Protaseviç Belarusda mövcud hakimiyyəti devirməyə cəhd edən MKİ-nin agentlərindən biridir. İstənilən ölkədə bu cür fəaliyyət ağır cinayət hesab edilir və buna görə kifayət qədər ciddi cəza tətbiq edilir. Bu səbəbdən də Avropanın əsasən şərq ölkələrinin, xüsusilə də Latviya və Litva kimi cırtdan dövlətlərin rəhbərlərinin reaksiyaları vəziyyətin sırf siyasi xarakter daşıdığını göstərir. Bu bəyanatlarda hüquqi qiymət verməkdən söhbət belə gedə bilməz”, – Korovin vurğulayıb.

Rusiyanın məsələyə sakit, Avropanın isə isterik yanaşması barədə sualı cavablandırarkən politoloq deyib: 

“Rusiyanın mövqeyi həmişəki kimi sakit, təmkinli, mülayim və sağlam məntiqə əsaslanmış şəkildədir - Ajiotajsız, isterikasız. Çünki qeyri-adi heç nə baş verməyib, Qərb xüsusi xidmət orqanlarının ruhuna tam uyğun proseslər baş verir. Təyyarədə olan Protaseviç beynəlxalq terrorçudur. O Avropa dövlətlərindən birinin konstitusion quruluşuna və suverenliyinə qəsd edən bir terrorçu olduğuna görə böyük ehtimalla onda bomba da var idi. Protaseviçdə bombanın olması ehtimalı eynilə İraqda kütləvi qırğın silahının və ya Suriyada kimyəvi silahların olması ehtimalına bərabər bir ehtimal idi. Daha doğrusu, əgər bir təyyarədə terrorist uçursa, deməli, o üzərində bomba da apara bilər. Ona görə də qeyd etmək lazımdır ki, Belarus Xüsusi xidmət orqanları sırf Qərb xüsusi xidmət orqanlarının yanaşması ilə hərəkət ediblər. Çexiya, Latviya, Litva kimi açıq-aşkar ABŞ-ın vassalı olan, Dövlət Departamenti tərəfindən birbaşa idarə edilən, MKİ-nin Avropadakı bütün oyunlarında qulluqçu kimi ona bağlı olan Şərqi Avropa dövlətlərinin liderlərinin belə isterik hərəkətləri təəccüblü deyil. Onlar Belarusda mövcud hakimiyyəti devirmək istədilər, onların agentləri məhz elə Qərb metodları ilə tutuldu və onlar bundan çox narazadırlar və iztirab çəkirlər. Çünki Protaseviç Belarusda qanuni hakimiyyətin devrilməsində vacib elementlərdən biri idi. Əlbəttə ki, onlar böyük itkilər verdilər. Xüsusilə də MKİ siyasi itkilərlə bərabər xeyli maliyyə itkisinə məruz qaldı. Ona görə də biz bu gün Avropanın belə isterik reaksiyalarını, Rusiyanın isə sakit, təmkinli, mülayim və sağlam məntiqə və qanuna əsaslanmış reaksiyasını görürük ”- deyə politoloq bildirib.