"Dağlıq Qarabağdakı əməliyyatlara NATO səviyyəsində də dəstək verilməlidir" - Ərdoğan

14 iyun, 2021 23:46

"Dağlıq Qarabağda 30 ildən sonra,  gec də olsa ədalət bərqərar edildi və bölgədə sülh yenidən bərpa olundu".

Azsiyasət.com xəbər verir ki, bunu Türkiyə Prezidenti Rəcəb Tayyib Ərdoğan Brüsseldə NATO sammitindən sonra keçirilən mətbuat konfransında bildirib.

Ərdoğan deyib ki, regionda münaqişənin yerini rifah və daimi sülh əvəz edib:

"Ölkəmizin sərhədləri kənarında dəstəklədiyimiz bu əməliyyatlara ittifaq tərəfindən də güclü dəstək verilməsini zəruri hesab edirik".

NATO sammitində və zirvə çərçivəsində keçirdikləri ikitərəfli görüşlərdə faydalı müzakirələr aparıldığını diqqətə çatdıran Türkiyənin dövlət başçısı ölkəsinin xarici siyasəti, qlobal və regional proseslərdə sərgilədiyi mövqe, o cümlədən terrorizmlə mübarizədə apardığı qətiyyətli mücadilə barədə geniş məlumat verib. Dövlət başçısı diqqətə çatdırıb ki, Türkiyə haqlı və mənafelərinə uyğun mövqelərini qorumaqda qərarlıdır.