"Siz mənim ağzımı qapadırsız..." - Putindən amerikalı jurnalistə
Rusiya prezidenti Vladimir Putin amerikalı həmkarı Cozef Baydenlə iyunun 16-da Cenevrədə keçiriləcək görüşü ərəfəsində ABŞ-ın NBC telekanalına müsahibə verib. Müsahibənin stenoqramını Kremlin rəsmi saytı yayıb və oradan məlum olur ki, aparıcı tez-tez Putinin sözünü kəsib. Rusiya prezidenti isə onu “qeyri-korrekt davranışda, amerika dəyərlərinə zidd hərəkətlərdə” ittiham edib. Və bildirib ki, jurnalist ona danışmağa imkan vermir, “ağzını qapadır”.
“Əgər siz hövsələ etsəniz və mənə sona qədər danışmaq imkanı versəniz, o zaman demək istəyirəm ki, sizə hər şey aydın olacaq. Amma siz istəmirsiz ki, mənim cavablarımı amerikalı tamaşaçılar eşitsinlər...siz mənim ağzımı qapadırsız”,-Putin bildirib.
Müsahibə zamanı Belarusda “Ryanair” təyyarəsinin məcburi endirilməsi, Rusiyada müxalifətin təqib edilməsi, Aleksey Navalnının həbsxana şəraiti və digər mövzulardan danışılıb.
