Azərbaycan yeni səfirlik açır - Qarabağ müharibəsində dəstək verən ölkədə

Elşən Mustafayev: “Bosniya və Herseqovinada səfirliyin açılması ilə bağlı xəbəri eşidəndə...”

Azər Hüseynov: “İlham Əliyev bu yeni geosiyasi situasiyanı çox gözəl başa düşür”

Azərbaycanın Bosniya və Herseqovinanın Sarayevo şəhərində səfirliyi təsis ediləcək. 

Prezident İlham Əliyevin iyunun 14-də imzaladığı sərəncamla Nazirlər Kabinetinə səfirliyin fəaliyyətinin təmin edilməsi ilə bağlı maddi-texniki təchizat və maliyyələşdirilmə məsələlərini, həmçinin bu sərəncamdan irəli gələn digər məsələləri həll etmək tapşırılıb.Azərbaycan Xarici İşlər Nazirliyi səfirliyin strukturunu və ştat cədvəlini təsdiq etməlidir.

Bosniya və Hersonovina niyə bizim üçün önəmlidir? 

Vaxtilə serblərin az qala genosidinə məruz qalanlar Qarabağ müharibəsində  bizə dəstək veriblər. Bu nüansı nəzərə alaraq, belə bir qərarın verilməsi hər kəs tərəfindən alqışlanır. Bu ölkədə səfirliyimizin olmasının önəmi xüsusi vurğulanır. Eyni zamanda, Azərbaycanın xarici siyasətində 16 il xarici işlər naziri olan Elmar Məmmədyarovdan fərqli olaraq onu əvəzləyən Ceyhun Bayramovun 11 aylıq nazir dönəmində çevik qərarların verilməsinin məntiqi nəticələrindən biri kimi Bosniya və Herseqovinada səfirliyimizin açılması istiqamətində atılan addımlar göstərilir.

Beynəlxalq əlaqələr üzrə ekspert Elşən Mustafayev bu mövzu ətrafında musavat.com-da çox vacib məqamlara toxundu: 

“Azərbaycanın diplomatik sahədə uğur qazanmasının yollarından biri də xarici ölkələrdə səfirliklərimizin açılmasıdır. İlk vaxtlar Azərbaycan böyük ölkələrdə səfirliklərini açsa da, sonradan digər ölkələrdə də diplomatik nümayəndəliklərimiz konsulluqlarımız, səfirliklərimiz açılmağa başlamışdı. Amma proses bir etapda demək olar ki, dayandı. Əgər ölkənin bu işləri görmək üçün maliyyə imkanları olmasaydı, başa düşülən olardı. Amma bilirik ki, belə bir problem yox idi. O zaman kim və ya kimlər bu məsələyə mane olurdu? Haradan tapşırıq alırdılar? Niyə bu işlərə məsul olanların işindəki uğurlar yalnız ailə bizneslərində özünü göstərirdi? Çünki Xarici işlər Nazirliyi uzun illər başda nazir olmaqla birbaşa işlərindən başqa hər bir işlə məşğul olurdular. Halbuki elə dövlətlər var ki, orada səfirliklərin açılması bizim üçün çox vacibdir. Belə məsələlərdə ölkələrin tək böyüklüyü, iqtisadi və hərbi gücü əsas gətirilməməlidir. Sadaladığım parametrlərə malik olmayan, amma bizim üçün böyük əhəmiyyət kəsb edən ölkələrlə də işlənilməlidir. Ola bilsin ki, həmin ölkə daxilində Azərbaycanla bağlı neqativ proseslər getsin. Məhz gələcəkdə bu proseslərin qarşısında durmaq, daxillərində fikirləri dəyişmək üçün səfirliyin olması mütləqdir. Yaxud bizimlə sıx münasibətdə olan, hər zaman dəstəklərini gördüyümüz ölkələr də var ki, bizim orada səfirliklərimiz yoxdur. Ən yaxşı halda 4-5 ölkəyə bir səfirlik praktikasından istifadə olunur ki, əslində belə yanaşma yumşaq desək həmin ölkələri ciddiyə almamaq kimi görünə bilər. Bu gün Bosniya və Herseqovinada səfirliyin açılması ilə bağlı xəbəri eşidəndə proseslərin müsbət istiqamətdə inkişaf edəcəyinə inamım artdı. Çoxdan belə addımlar lazım idi. Yəni vacib deyil ki, bütün ölkələrdə geniş ərazidə və böyük statda diplomatik korpus açasan. Əsas odur ki, ölkə ilə işləmək perspektivlərinə uyğun kiçik, amma effektiv səfirlik formalaşdırılsın. Eyni zamanda, bütün səfirlərin, diplomatların iş keyfiyyətlərini araşdırmaq, yoxlamaq vacibdir. Səfirliklər işdən çıxan məmurlar üçün ehtiyat iş yeri hesab olunur. Həmçinin gördüyümüz o olub ki, bir çox hallarda diplomatik işə qabiliyyət və bacarığına görə deyil, hansısa məmurun , böyük vəzifə sahibinin yaxını, qohumu olduğuna görə təyin olunub. Bu problemləri aradan qaldırmaq hazırda əsas hədəf olmalıdır. Eyni zamanda, çoxdandır ki, ləngiyən, Azərbaycan üçün açılması çox vacib olan İsraildə səfirliyimizin olmaması da yaxşı hal deyil. Hazırda 90-cı illər deyil ki, İranı incitməmək üçün bu addımı atmırdıq. İran özü dövlət marağı deyərək düşmənlərimizlə iqtisadi, diplomatik, hətta bəzən hərbi sahədə əməkdaşlıq etdiyi halda biz niyə dövlət marağımızın tələb etdiyi addımları atmamalıyıq?”.

Politoloq Azər Hüseynov bu addımı alqışlayır: 

“Azərbaycanın Bosniya Herseqovinada səfirlik açması Türkiyə və Azərbaycanın birgə fəaliyyətinin məntiqi nəticəsidir. Bosniya Hersoqovinanın müsəlman xalqı, həm də bizim sanki qədər ekizimizdir. Məmmədyarov məsələsinə gəldikdə isə, rusca düşünən diplomatlar Post Osmanlı reallığının əhəmiyyətini tam tutmaz. Azərbaycanın Dövlət Başçısı İlham Əliyev isə bu yeni geosiyasi situasiyanı çox gözəl başa düşür. Hesab edirəm ki, bütün xarici siyasi bürokratiyanın da bunu anlaması lazımdır. Gələcəkdə Azərbaycan Bosniyaya kapital yatırsa lap əla olar. Bu Azərbaycanın yeni geosiyasi pazlda Türkiyə ilə həmmüəllif olmasına gətirib çıxardar. Bir də Bosniya dedin, Balkanlar dedin. Balkanlar dedin, strateji məkan dedin. Alqışlanası addımdır”.