"Zəngəzur dəhlizi olmayacaq" - Paşinyan

Ermənistan hansısa dəhlizlə bağlı müzakirə aparmayıb və aparmayacaq.

Azsiyaset.com xəbər verir ki, bu sözləri Ermənistan baş naziri vəzifəsini icra edən Nikol Paşinyan İrəvandakı yekun mitinqdə elan edib.

N.Paşinyan Azərbaycan rəhbərliyinin Zəngəzur dəhlizinin açılması ilə bağlı bəyanatını da təkzib edib:

“Ermənistanın suveren ərazisində kommunikasiyaların açılması ilə bağlı hər hansı dəyişikliyi tam şəkildə istisna edirik”.

Paşinyan hətta Azərbaycan və Türkiyə liderlərinin Ermənistan ərazisindən koridorla bağlı bəyanatlarını “absurd” adlandırıb:

“Biz öz mövqeyimizi çox dəqiq ifadə etmişik. Regionun iqtisadi kommunikasiyaları açılmalıdır. Bu kommunikasiyadan ölkələr bərabər imkanlar əldə etməlidir, 11 yanvarda Moskvada qəbul edildiyi kimi. Ermənistan bu bəyanatın müddəalarını həyata keçirməyə hazırdır”.

Paşinyan iddia edib ki, kommunikasiyaların açılmasına Azərbaycanın aqressiv və destruktiv mövqeyi mane olur. O, buna “sübut” kimi Ermənistan ərazisinə müdaxilə və “əsirlərin” qaytarılmamasını göstərib.

Buna baxmayaraq, Paşinyan 15 əsirin geri qaytarılmasının regionda atmosferi dəyişəcəyinə ümid yaratdığını da vurğulayıb.

Qeyd edək ki, Azərbaycanın qərb sərhədləri ilə Naxçıvan arasında birbaşa quru yolunun açılması 10 noyabr və 11 yanvar bəyanatlarında əksini tapıb. Azərbaycan Zəngəzur koridorunun Ermənistanın istəyindən asılı olmayaraq, açılacağını, bununla bağlı Rusiya ilə müzakirələr getdiyini bildirib. Belə ki, Ermənistanın dəmir yollarının 100 faiz sahibi Rusiyadır.

Eyni zamanda, Şuşa Bəyannaməsində də Zəngəzur dəhlizi xüsusi olaraq ayrıca maddə kimi qeyd edilib.

N.Paşinyanın destruktiv mövqeyi və üzərinə götürdüyü öhdəlikləri yerinə yetirməməsi nəticədə 44 günlük Vətən müharibəsinə səbəb oldu. İndi də N.Paşinyan 10 noyabrda imzalamaqla üzərinə götürdüyü öhdəlikləri icra etməkdən yayınır.

Xatırladaq ki, Rusiya lideri Vladimir Putin Ermənistanın 10 noyabr bəyanatının tələblərindən imtinasının intihar olduğunu bildirmişdi.