Bayden zenit-raket komplekslərini Yaxın Şərqdən çıxarır, Rusiya tərəfə göndərir...

ABŞ prezidenti Cozef Baydenin administrasiyası bəzi Yaxın Şərq ölkələrindən qoşunların və hərbi texnikanın bir hissəsini çıxarır. Bu haqda “The Wall Street Journal” qəzeti Pentaqondakı mənbələrə istinadən yazır.

Nəşrin bildirdiyinə görə, Birləşmiş Ştatlar İraq, Küveyt, İordaniya və Səudiyyə Ərəbistanından 8 “Patriot” zenit-raket batareyasını geri çəkməyə hazırlaşır. Habelə THAAD raketdən müdafiə sistemləri və Səudiyyə Ərəbistanından döyüş təyyarələrinin bir hissəsi də çıxarılır. Bildirilir ki, Bayden administrasiyası özünün regiondakı hərbi iştirakına yenidən baxır və raket əleyhinə sistemlərin sayını kəskin azaldır, çünki bu sistemlər Çin və Rusiyadan qaynaqlanan təhdidlərə qarşı başqa regionlara yenidən dislokasiya olunacaq.

Pentaqonun nümayəndələri deyiblər ki, ABŞ-la İran arasında hərbi əməliyyatların eskalasiyası riski azalıb və digər tərəfdən Yaxın Şərqə silahların göndərilməsi Tehranı regionda stabilliyi pozan hərəkətlərdən çəkindirməyib. Digər tərəfdən Yaxın Şərqdə yerləşdirilmiş Amerika raketdən müdafiə sistemlərinin bəzilərinin texniki qulluğa ehtiyacı var.

Bundan əvvəl Bayden administrasiyası Əfqanıstandan qoşunları çıxarmaq qərarı verib və bu ölkədəki hərbi iştirakını kəskin azaldıb.