Gədəbəydə düşmən əlinə keçən əsgəri diri-diri yandırmaq istədilər dırmayın..." - "Birdən xəbər gəldi ki, onu yan

Bakıda Birinci Qarabağ Müharibəsində azərbaycanlı əsirlərə işgəncə vermiş və digər cinayətlər törətmiş erməni hərbi canilər - Mkrtiçyan Lüdvik Mkrtiçoviç və  Xosrovyan Alyoşa Aramaisoviçin işi üzrə növbəti məhkəmə prosesi keçirilib.  

Azsiyasət.com virtualaz.org-a istinadla xəbər verir ki, Bakı Hərbi Məhkəməsinin hakimi Elbəy Allahverdiyevin sədrliyi ilə keçirilən məhkəmə prosesində yenə zərərçəkmişlər dindirilib. Erməni əsirliyində qeyri-insani rəftarla üzləşən zərərçəkmişlər onlara verilən işgəncələrdən danışıblar.

Zərərçəkmiş Elşən İslamov ifadəsində deyib ki,  1997-ci ildə Gədəbəy rayonunda hərbi xidmətdə olarkən erməni kəşfiyyatı tərəfindən əsir götürülüb. O, şəxsən Lüdvik Mkrtçyan tərəfindən amansız işgəncələrə məruz qalıb, deyir ki, bu cəlladı televizorda görən kimi tanıdı.

Keçmiş hərbi əsir başına gələnləri məhkəmədə belə nəql edib: "1999-cu ildə Yerevandakı təcridxanadaya apardılar. Məni bir otağa saldılar, Mkrtçyan gəldi, mənimlə söhbət elədi. Dedi ki, ad soyadını dəyişib Ermənistanda qalacaqsan ailə quracaqsan, Ermənistan vətəndaşlığını qəbul edəcəksən, Azərbaycanlılara qarşı döyüşəcəksən. Razılaşmadığıma görə mənə amansız işgəncələr verdi. Sonra məni Şuşa türməsinə güllələməyə apardılar. Əsir götürüləndə bloknotumu görüb " tı xudojnik?" deyə soruşdular. Mənim rəssamlığa meylim vardı. Bir kağız gətirdilər ki,  erməni zabitinin şəklini çək. O zabitin gözünü necə var eləcə də çəkmişdim. Buna görə məni dəmirlə döyməyə bağışladılar. Qış idi, çıxardılar qarın üstünə orda məni 20-30 nəfər əsgərə təhvil verdilər. Əsgərlər məni yerə uzadıb əllərimi bağladı, üstümə bir kanistr benzin tökdülər, kanistri başımın altına qoydular. Biri lopa düzəldib əlində tutdu,  hazırlaşırdılar ki, məni yandırsınlar. Birdən xəbər gəldi ki onu aparırıq,  yandırmayın. Əlində lopa tutan erməni lopanı söndürdü. Başladılar yenidən döyməyə ki səni niyə yandırmağa qoymadılar...”

Düşmən əsgərləri daha sonra Elşən İslamovu maşına mindiriblər, daha doğrusu maşında onu ayaqlarının altına uzadıblar. Yeməyə nəsə  veriblər, amma yemək istəyəndə döyüblər. Maşını hansısa kənddə saxlayıblar. Yerə düşürüb başından elə güclü zərbə vurublar ki, huşunu itirib. Ayılanda əllərinin boruya bağlandığını, başına qara torba keçirdiklərini görüb.

“Betonun üstünə uzatmışdılar. Şuşa türməsində olduğumu bildim. Çoxlu yaralı azərbaycanlı əsirlər vardi. Birinin gözünü çıxarmışdılar. Çoxusu deyirdi ki, 1992 ci ildə əsir düşmüşük. Betonun üstünə su tökürdülər, orada yatırdıq. Döyülməyə bədənim alışmışdı. Ayaqyoluna gedəndə də döyülürdük.  Bir dəfə bizə dedilər Qırmızı Xaç gəlir. Elə bildim ermənilər xaçla damğa vuracaqlar. Deyirdim kaş öldürsünlər amma damğalamasınlar",-keçmiş hərbi əsir deyir.

 Zərərçəkmiş deyir ki, Beynəlxalq Qırmızı Xaç Komitəsinin nümayəndəsi əsirlərlə görüşdükdən sonra onlara pal-paltar, yorğan-döşək verilib. Amma nümayəndələr getdikdən sonra ermənilər hamısını əllərindən alıblar: "Komitə nümayəndəsi gedəndən sonra yorğan döşəyi aldılar.  Sonra məni iki nəfər maşına mindirib bir dağa apardılar. Orda düşürdülər ki,  güllələyəcəyik. Sevindim ki, biryolluq canım qurtarır. Geriyə baxanda gördüm bizim postumuzdu. Məni saxladılar başladılar bizimkilərə tərəf atəş açmağa. İstəyirdilər ki bizimkilər də atəş açsın,  bizi vursun. Amma bizimkilər məni vurmadılar".

E.İslamov bildirib ki, Mkrtçyan ona  Şuşa türməsində də  amansız işgəncələr verib,  kəlbətinlə qızıl dişlərini çıxardıb. “Onun baxışları heç vaxt bu illər ərzində gözümün önündən getməyib",-məhkəmədə erməni hərbi cani ilə üzləşən keçmiş əsir deyib.

Məhkəmədə digər zərərçəkmişlər-keçmiş hərbi əsirlər də danışıblar və bu iki erməni cəlladının onlara elədikləri zülmlər, qeyri-insani işgəncələr haqda danışıblar. Bu danışılanları daha sonra oxuculara təqdim edəcəyik.