Paşinyan Köçəryanı həbs edib Azərbaycana verə bilərmi? - AÇIQLAMA
“Bizdə bəzi şəxslər illuziya içərisində yaşayır. Bu, sadəcə fantastikadır. Köçəryan Putinin dostudur. Paşinyan Köçəryanın həbs etdirib birbaşa Rusiya ilə düşmən olsun? Belə xəyallara biz niyə qapılırıq?”.
Azsiyasət.com xəbər verir ki, bu sözləri yenisabah.az-a açıqlamasında Türkiyədə yaşayan azərbaycanlı politoloq, professor Toğrul İsmayıl deyib. Siyasi şərhçi sosial mediada yer alan “Baş nazir Nikol Paşinyan Robert Köçəryanı yenidən həbs etdirə bilərmi?” sualının heç bir məntiqə söykənmədiyini vurğulayıb:
“Bizim özümüzün təhlükəsizlik xidmətimiz var. İsrail alman nasistlərindən yəhudi xalqına qarşı xüsusi işgəncə vermiş, zalimlik göstərmiş şəxsləri özü ovlayaraq ölkəsinə gətirdi. Yəni bir az da özümüzə güvənək, niyə bu məsələni Paşinyanın üzərinə yıxırlar? Köçəryanın həbsini istəyirsənsə, gedib Moskvadan, ya başqa yerdən tutub gətirərsən. Onu cəzalandırmağın müxtəlif yolları var. Xəyal qurmağa ehtiyac yoxdur”.
Həmsöhbətimiz Paşinyanın heç vaxt belə bir addım atmayacağını diqqətə çatdırıb:
“Birincisi, Köçəryan artıq parlamentdə təmsil olunan siyasi liderdir, toxunulmazlığı var. İkincisi, əvvəldə də qeyd etdiyim kimi, Putinin şəxsi dostudur. Bunların fonunda isə səsləndirilən fikir heç cür real görünmür. Düşünürsünüz ki, Ərdoğan Şuşaya gedəndə Rusiya, ABŞ və İranla görüşməyib? Hamısı ilə görüşülərək təhlükəsizlik təminatı alınıb. İndi Köçəryan kimi bir şəxsi tutmaq üçün də görüşlər olmalıdır. Məsələn, Türkiyə Abdullah Öcalanı tutarkən dünyanın bir çox ölkəsi ilə görüşüb icazə aldı, yəni bu cür məsələlər düşünüldüyü qədər bəsit deyil. Nəyisə könlü istəmək ayrıdır, mən sadəcə mütəxəssis kimi yanaşıram”.
