Rusiya Ermənistanda yeni hərbi baza qurur - İrəvandan Moskvaya böyük heyət gedib

Rəsmi İrəvan və Moskva Ermənistandakı Rusiya hərbi bazasının genişləndirilməsi barədə danışıqlara başlayıblar.

Azsiyasət.com azpolitika.info-ya istinadla xəbər verir ki, bu barədə erməni mediası məlumat yayıb. Bu məqsədlə Ermənistanın müdafiə, xarici işlər, ərazi və infrastruktur idarəetməsi nazirliklərinin, habelə Ermənistan Silahlı Qüvvələri baş qərargahının, Rusiya-Ermənistan birgə hərbi qruplaşmasının və kadastr komitəsinin nümayəndələri iyunun 26-da Rusiya paytaxtına səfər ediblər.

Ermənistan Baş nazirinin səlahiyyətlərini icra edən Nikol Paşinyanın 23 iyun tarixli qərarında deyilir: “Ermənistan-Rusiya dövlətlərarası komissiyasının 13-cü iclasında Ermənistandakı Rusiya hərbi bazasına torpaq sahələrinin və daşınmaz əmlakın verilməsi məsələsi müzakirə olunacaq”.

Bu da qeyd olunur ki, dövlətlərarası komissiyanın iclası iyulun 1-dək davam edəcək. 14 nəfərdən ibarət nümayəndə heyətinə Müdafiə Nazirliyi qoşunlarının yerləşdirilməsi üçün kapital tikinti idarəsinin rəisi, eyni zamanda dövlətlərarası komissiyanın sədri Armen Avetisyan başçılıq edir.

Ermənistan nümayəndə heyətinin yarısını Müdafiə Nazirliyi təşkil edir, lakin nümayəndələrdən əlavə məlumat almaq mümkün olmayıb.

Xatırladaq ki, Rusiya-Ermənistan dövlətlərarası komissiyasının iclası iyunun 28-də başlanıb. Bundan bir ay bundan əvvəl, mayın 27-də hökumət müşavirəsində Rusiya Federal Təhlükəslik Xidməti (FTX) sərhəd qoşunlarının yerləşdirilməsi üçün Sünik vilayətində 3.5 hektar torpaq sahəsinin təmənnasız istifadə üçün Rusiyaya verilməsi barədə qərar qəbul olunmuşdu.

Bu da xəbər verilir ki, Rusiya sərhədçilərinə Qafan icmasının Şıxovuz (Şikahoq), Meğri və Tuğ icmalarının Şvinadzor, Karçan, Nüvədi kəndlərindən 7 hektar torpaq sahəsi veriləcək.

Hökumət bildirib ki, 9 noyabr 2020-ci il tarixli üçtərəfli bəyanata uyğun olaraq Ermənistanın cənub-şərq sərhədlərinin möhkəmləndirilməsinə ehtiyac var (üçtərəfli bəyanatda konkret olaraq bu barədə heç nə deyilmir – red).

Xatırladaq ki, Rusiyanın Ermənistandakı 102 saylı hərbi bazasının genişləndirilməsi və ya yeni Rusiya hərbi bazasının yaradılmasına dair söhbətlər çoxdan dolaşır.

Mayın 3-də Milli Məclisdə çıxış edən Paşinyan demişdi ki, müharibəyə qədər və müharibədən sonra Ermənistanın xarici təhlükəsizlik sisteminin əsasını Rusiya-Ermənistan birgə hərbi qruplaşması təşkil edir: “Sünikin təhlükəsizliyi və 102-ci baza barədə məsələ qaldırılıb. Düşünürəm, bu sirr deyildir ki, Sünik vilayətində 102-ci Rusiya bazasının iki yeni dayaq məntəqəsi yaradılıb. Bu yeni dayaq məntəqələrinin yaradılması Sünik vilayətinin və bütövlükdə Ermənistanın təhlükəsizliyinin təminatı üçün əlavə qarantiyadır”.

Erməni mediası isə iroaniya ilə yazır ki, Ermənistan-Rusiya hərbi qruplaşmasının olmasının, habelə KTMT-də üzvlüyün Ermənistanı nə dərəcədə effektli müdafiə etməsi 44 günlük müharibənin gedişində bəlli olub.