"Socar New Energy" Ukraynada "Glusco" yanacaqdoldurma stansiyaları şəbəkəsini alır - Sövdələşmə başa çatıb

Ukraynada “Glusco” yanacaqdoldurma stansiyalarının yeni sahibi Kiprdə qeydiyyatdan keçmiş “Socar New Energy Ltd” (SNE) şirkəti olacaq. Bu haqda enkorr.ua Azərbaycanın neft dairələrindəki mənbələrə istinadən bildirir.

“Bu sövdələşmə üçün strukturu seçməyə uzun vaxt getdi, sonra “Socar New Energy “ şirkətinin üzərində dayandılar”,-Azərbaycandan olan neft-treyder strukturunun top-meneceri (adı açıqlanmır,-red.) bildirib. Onun sözlərinə görə, sövdələşmə “Glusco Energy” şirkətinin səhmlərinin 100 faizinin alınmasını nəzərdə tutur və bu haqda yaxın vaxtlarda Kipr şirkətinin qeydiyyat sənədlərində qeydlər əksini tapacaq.

“Sövdələşmə artıq başa çatıb”,-mənbə bildirib.

Bununla belə, Socar New Energy Ukraynada işləmək üçün bu ölkənin Antiinhisar Komitəsinin icazəsini almalıdır. Avropa qanunvericiliyinə görə, şirkət həm də SOCAR-ın fəaliyyət göstərdiyi Gürcüstan, Türkiyə və daha bir neçə ölkənin antiinhisar orqanlarının razılığını formal da olsa, əldə etməlidir.

“Ukraynanın Antiinhisar Komitəsinə ərizə yaxın on gün ərzində, iyulun ikinci ongünlüyündə təqdim ediləcək”,-mənbə deyib.

“Glusco” yanacaqdoldurma stansiyaları şəbəkəsi Rusiyanın “Rosneft” dövlət şirkətinin parakəndə satış biznesinin bazasında formalaşdırılıb. 2016-cı ildə şəbəkəni “Proton Energy Group S.A.” beynəlxalq treyder şirkəti özünün “Glusco Energy S.A” törəmə şirkəti vasitəsilə alıb. Hazırda şəbəkəyə 126 yanacaqdoldurma stansiyası və 6 neft bazası daxildir. Şirkət habelə Kiyevin “Borispol” və “Kiyev” aeroportlarında təyyarələrə yanacaq doldurur.

2021-ci il martın ortalarında “Proton Energy Group” bildirdi ki, “Rosneft” Ukraynaya yanacaq təchizatını məcburi dayandırıb. Aprel ayında isə “Coral Energy” treyder şirkəti “Rosneft” yanacağının Ukraynaya yeni ixracatçısı olacağını açıqlamışdı. Lakin may ayında SOCAR “Rosneft”lə müqavilə bağladığını elan etdi və həmin ayın sonundan etibarən Ukraynaya yanacaq təchizatına başladı. Şirkət “Rosneft”lə bu sövdələşmə üzrə müqavilə bağlamaq üçün xüsusi olaraq “Socar New Energy” törəmə şirkətini təsis edib.

virtualaz.org