Sərhəddə gərginlik artır: Türkiyə ordusu hərəkətə keçir?
Ötən gün axşam saatlarında erməni silahlı dəstələri Şuşa şəhəri ətrafındakı mövqelərimizi pulemyot və avtomatlardan atəşə tutub. Hadisə nəticəsində bölmələrimizin şəxsi heyəti arasında həlak olan və yaralananlar olmasa da, son günlər düşmənin mütəmadi olaraq atəşkəsi pozması cəmiyyətdə ciddi narahatlıq doğurur. Oxşar hadisə bu gün Naxçıvanla sərhəddə də baş verib.
Maraqlıdır, bu vəziyyət intensiv xarakter alsa və Azərbaycan üçün real təhlükə yaransa, Türkiyə Şuşa Bəyannaməsindən çıxış edərək prosesə qoşula bilər?
Azsiyaset.com xəbər verir ki, mövzu ilə bağlı yenisabah.az-a danışan politoloq Fikrət Sadıxov diqqətə çatdırıb ki, hazırda Ermənistana qarşı adekvat addım atmaq üçün kifayət qədər əsasımız var:
“Həm diplomatik müstəvidə, həm hərbi səviyyədə onları susdura bilərik. Ermənilər artıq anlamalıdır ki, bizim bunları etməklə bağlı problemimiz yoxdur. Onlar Türkiyə ilə Şuşa Bəyannaməmizin olduğunu yaddan çıxarmamalıdır. Çünki bu bəyannamə bizə onlara qarşı hərtərəfli cavab verməyə tam əsas verir. Əgər onlar bundan sonra da təxribatlarla məşğul olmaq istəyirlərsə, unutmasınlar ki, yeni bir güc-Azərbaycan-Türkiyə birliyi yaranıb. Əgər Şuşaya atəş açırlarsa, deməli, Türkiyəyə qarşı da bu addımı atırlar, bunu başa düşməli və müəyyən nəticə çıxarmalıdırlar. Bəyannamədə bunları əks etdirən müvafiq maddələr var. Belə ki, əgər Azərbaycan ərazisinə müəyyən təhlükə yaranarsa, təbii ki, bizim müttəfiqimiz bizə kömək edəcək”.
