Ermənistan Azərbaycanın ərazi bütövlüyünü tanımasa...

“Ermənistan cəhd edir ki, prosesə ABŞ və Fransanı Minsk qrupunun həmsədri kimi qoşsun. Məqsəd də ondan ibarətdir ki, Qarabağda yaşayan ermənilərin statusla bağlı məsələsi həllini tapsın, guya onlara status verilsin. Amma Azərbaycan üçün bu məsələ artıq qapanıb”.

Azsiyaset.com xəbər verir ki, bunu reyting.az-a siyasi şərhçi Oqtay Qasımov Ermənistanın və onların beynəlxalq aləmdəki himayədarlarının Qarabağda yaşayan ermənilərə status verilməsi kimi əsassız tələblərindən danışarkən deyib.

O. Qasımov xatırladıb ki, Dağlıq Qarabağa status 1923-cü ildə Azərbaycan Sovet Sosialist Respublikasının Nazirlər Sovetinin qərarı ilə verilib: “Yəni bu, beynəlxalq status olmayıb, ölkə daxilində hökumətin verdiyi qərar olub. Bunun beynəlxalq hüquqa və ya beynəlxalq səviyyəyə çıxmasına nə ehtiyac var, nə də əsas.

İkincisi, ATƏT-in Minsk qrupu ona görə yaradılıb ki, Ermənistan və Azərbaycan arasında vasitəçilik edərək bu məsələnin həllinə nail olsun. Minsk qrupunun əsas vəzifələrindən biri BMT-nin işğalçı ordunun Azərbaycan ərazilərindən çıxarılmasına dair 4 qətnaməsinin yerinə yetirilməsi ilə bağlı olub. Minsk qrupunun qarşısına heç bir halda hansısa status məsələsinin müzakirəsi və onun gündəmə gətirilməsinə dair məsələ qoyulmayıb. Onlara verilən mandat imkan vermir ki, absurd status məsələsini gündəmə gətirərək bunu Azərbaycana sıramağa cəhd etsinlər. Eyni zamanda ölkələrin suverenlik hüquqları buna imkan vermir”.

Siyasi şərhçi diqqətə çatdırıb ki, status söhbəti 1998-ci ildən sonra gündəmə gətirilməyə başlanıb: “Minsk qrupunun həmsədri olan və Ermənistanı müdafiə edən bu ölkələr əslində hərbi, iqtisadi və siyasi cəhətdən İrəvanı dəstəkləyiblər”.

Analitik xatırladıb ki, əslində status mövzusu işğalın nəticələri ilə bağlı məsələdir: “1998-ci ilə qədər aparılan danışıqlarda status mövzusu prioritet sayılmayıb. Orada sadəcə, “torpaqlar əvəzinə sülh prinsipi” ortaya qoyulub. Ermənistanda Köçəryan hakimiyyətə gəldikdən sonra status məsələsi Minsk qrupunun həmsədrləri tərəfindən qabardılıb və dəstəklənib. Ancaq bu gün işğal faktı böyük mənada ortadan qardırılıdığından, bu işğalın nəticəsi olaraq ortaya çıxan status məsələsi də əslində həllini tapıb. Məncə, məsələyə bu istiqamətdən yanaşmalıyıq. Status məsələsi işğalın törətdiyi nəticə idi. İşğal faktı böyük ölçüdə ortadan qaldırıldığından status məsələsi də bizim üçün bitib. Məsələ əslində belə qoyulmalı və biz bu mövqeyimizdə sərt olmalıyıq”.

O. Qasımov bir daha qeyd edib ki, Minsk qrupu statusa dair görəvləndirilməyib və onun belə bir mandatı da yoxdur. Bu, Azərbaycanın daxili məsələsidir. Belə iddialarda olan ölkələrə Azərbaycan sərt cavab verməlidir.

O. Qasımov sonda əlavə edib ki, əgər Ermənistan Azərbaycan dövlətinin ərazi bütövlüyünü tanımayacaqsa, heç dünəndən tanımasın: “Əvvəla indiki Ermənistan tarixi Azərbaycan torpaqlarında yaradılıb. Ermənistan bizim ərazi bütövlüyümüzü tanımayacaqsa, bu o deməkdir ki, biz də onu tanımayacağıq. Bu hal imkan verir ki, biz İrəvana, Göyçəyə, Dərələyəzə, Zəngəzura, Vediyə, Ağbaba mahalına və Dağlıq Borçalı deyilən ərazilərə iddiamızı ortaya qoyaq”.