"Ermənistan Ərdoğanın və Əliyevin mesajlarını yaxşı anlamalıdır, əks halda..." - AKP sözçüsü
“Ermənistan Türkiyə Prezidenti Rəcəb Tayyib Ərdoğanın və Azərbaycan Prezidenti Əliyevin mesajlarını yaxşı anlamalıdır. Əks təqdirdə yeni problemlərlə qarşılaşacaq”. Türkiyənin hakim Ədalət və İnkişaf Partiyasının (AKP) sözçüsü Ömer Çelik özünün “Twitter” səhifəsində belə yazıb.
Türkiyə KİV-lərinin xəbərlərinə görə, Ermənistanın Kəlbəcərdə həyata keçirdiyi hücum nəticəsində Azərbaycan hərbiçisinin şəhid olmasına münasibət bildirən Ömer Çelik bu əməli sərt şəkildə qınayıb: “Bu hücumu lənətləyirik. Ermənistan təcavüzkar siyasətini davam etdirir. Bu, bölgədə sülhə təhlükədir. Ermənistanın regionda sülhü təhlükə altına almasına icazə verilməyəcək”.
AKP sözçüsü onu da vurğulayıb ki, Türkiyə Prezidenti R.T.Ərdoğan da bölgə ölkələri ilə qurulacaq əməkdaşlıq mexanizminin əhəmiyyətinə diqqət çəkib: “Prezidentimiz də dedi ki, Ermənistan təcavüzkarlıqdan imtina edərsə, bu mexanizmə daxil edilməlidir. Ermənistan bu tarixi fürsəti qaçırmamalıdır”.
