"Gözəgörünməz" nazir müavini işdən çıxarıldı - yeni vəzifə verildi

Azərbaycan Respublikası (AR) Prezidenti İlham Əliyevin Sərəncamı ilə vəzifədən azad olunan Nadir Hüseynova yeni vəzifə verilib.

N.Hüseynov Xarici İşlər nazirinin əmri ilə xüsusi tapşırıqlar üzrə səfir təyin edilib. O, 2010-cu ildən nazir müavini vəzifəsində çalışırdı.

N.Hüseynovun adı isə Dövlət Təhlükəsizlik Xidməti Xarici İşlər Nazirliyində iyulun 3-də başlatdığı antikorrupsiya həbslərindən sonra gündəmə gəlmişdi. 

Qeyd edək ki, rəisi həbs edilən Konsulluq İdarəsi N.Hüseynovun kurasiyasında olub. N.Hüseynov 2010-cu ilin noyabrın 24-dən nazir müavini postunda işləyirdi. O, 1992-1998-ci illərdə Xarici İşlər Nazirliyinin Dövlət Protokol İdarəsinin 1-ci katibi, şöbə müdiri, idarə rəisinin müavini, 1998-2010-cu illərdə Xarici İşlər Nazirliyi Konsulluq İdarəsinin rəisi olmuşdur.

2002-ci il yanvarın 12-də ona fövqəladə və səlahiyyətli səfir dərəcəsi verilib. 2010-ci ilin noyabrın 24-də nazir müavini vəzifəsinə təyin edilib. Onu az-az hallarda Bakıya gələn əcnəbi qonaqları qarşılayanlar sırasında görmək mümkün idi. 

Özünü həmişə arxa planda saxlamağı xoşlayan sabiq nazir müavinin “zamministr nevidimka”(gözəgörünməz) adlandırırmışlar. Ötən ay Nadir Hüseynov və daha bir müavinin XİN-də baş verən pozuntularla bağlı DTX-ya çağırılıb, saatlarla ifadə vermələri barədə xəbər yayılmışdı.

Qeyd edək ki, prezident İlham Əliyev iyulun 16-da Ceyhun Bayramovu xarici işlər naziri təyin olunması ilə əlaqədar videoformatda qəbul edərkən “ilk növbədə, nazirlik sistemində vəziyyət sağlamlaşdırılmalıdır. Kadr siyasətində şəxsi tanışlıq, rəğbət, dostluq əlaqələri yox, peşəkarlıq, vətənpərvərlik və milli dəyərlər əsas olmalıdır. Peşəkar, Vətənə bağlı olan, bilikli və Azərbaycanın maraqlarını layiqincə müdafiə edə bilən kadrlar önə çəkilməlidir ” deyə, bildirib.