Ermənistan parlamentində yenə dava düşdü - İclas ikinci dəfə dayandırıldı

Ermənistan parlamentində deputatlar arasında yenə dava düşüb. “Sputnik-Armenia” xəbər verir ki, dava zamanı sərt söyüşlər eşidilirdi.

Qeyd olunur ki, budəfəki dava bu dəfə iqtisadi məsələlər komissiyasının rəhbəri, “Hayastan” blokunun deputatı Vahe Akopyanın çıxışı zamanı baş verib.

Çıxış zamanı hakim partiyanı təmsil edən deputat Akopyana sual verib. Akopyan cavab verib və kürsüdən ayrılaraq "Mülki Müqavilə" fraksiyasına doğru getməyə başlayıb. Əvvəlcə sözlü atışması baş verib, sonra isə yumruqlar işə düşüb. Deputatlardan biri Akopyana təpik vurub.

Parlamentin spikeri Alen Simonyan dərhal sessiyanı dayandırıb. Qeyd edək ki, bu, gün ərzində artıq ikinci dəfə baş verib. Bundan sonra da mübahisə davam edib.

***

Ermənistan parlamentində artıq ikinci gündür ki, müzakirələr müxalifətlə hakim partiyadan olan deputatlar arasında əlbəyaxa çəkişmə və qarşılıqlı təhqirlərlə müşaiyət olunur. virtualaz.org erməni KİV-lərinə istinadən xəbər verir ki, hakim “Vətəndaş müqaviləsi” partiyasından deputat Ayk Sərkisyan müxalif “Ermənistan” fraksiyasının rəhbəri, keçmiş müdafiə naziri Seyran Ohanyanı korrupsiyada ittiham edib. “Sizin vaxtınızda kim istəsə pulunu verib ordudan yayınırdı” deyib. Buna cavab olaraq Seyran Ohanyan Ayk Sərkisyana tərəf su butulkası atıb.

Qeyd: Ayk Sarkisyan ölkədə 2018-ci ildə baş verən inqilab zamanı "butulka daşıyan" ləqəbini alıb. O, həmin vaxtlar indiki baş nazir Nikol Paşinyan üçün su butulkasını daşıyırdı.

Dərhal iqtidardan və müxalifətdən olan başqa deputatlar da butulkalara əl atıblar və parlamentdə əsl butulka davası başlayıb. Ara qarışıb və baş nazir Nikol Paşinyanın qaynı, “Vətəndaş müqaviləsi” partiyasından deputat Qraçya Akopyan da müxalifətçi deputatların üstünə hücum çəkib. Bu vaxt mühafizə xidməti Akopyanı da zorla zaldan çıxarıb.

“Meydan” (“Qraparak”) qəzetinin müxbiri bu səhnəni telefonla çəkəndə Akopyan onun ünvanına küçə söyüşü söyüb.

Daha sonra Paşinyanın qaynı bildirib ki, Seyran Ohanyanın deputat Ayk Sərkisyana butulka atmasına görə özündən çıxıb: “Seyran Ohanyan butulkanı götürdü və Ayk Sərkisyana tərəf atdı. Sonra da bütün bunlar oldu. Bilin ki, bu müxalifətçilər kimlərdir”. Qraçya Akopyan Ayk Sərkisyanın dediklərini təsdiqləyib və bildirib ki, keçmiş müdafiə nazirinin vaxtında orduda korrupsiya baş alıb gedirdi. Paşinyanın qaynı onu “vətən xaini” adlandırıb.

Akopyan zaldan niyə çıxarıldığı haqda suala cavabında deyib: “Bilmirəm, mən hirsimdən özümdəm çıxmışdım”.

Çox keçmədən parlamentdə ara yenidən qarışıb. Bu dəfə “Ermənistan” blokundan deputat Vaqe Akopyanın çıxışı zamanı hakim partiyadan kimsə ona atmaca atıb, nəticədə əvvəl qarşılıqlı təhqirlər yağdırılıb, ardınca əlbəyaxa çəkişmə başlayıb. Bu dəqiqələrdə Ermənistan parlamentində gərginlik davam edir, baş nazir Nikol Paşinyan isə zalda yoxdur. “O, həmişəki kimi aradan çıxdı”,-müxalifətçilərdən biri atmaca atıb.

Xatırladaq ki, ötən gün müxalif deputatlardan biri Paşinyan hökumətin proqramını təqdim edərkən onu “kapitulyant” adlandırmışdı. Bundan sonra spiker həmin deputatı zaldan çıxarmağı tapşırıb və nəticədə qarşıdurma yaranıb.