"Azərbaycan işıqları ilə möhtəşəm işıqlandırılmış Şuşa hətta Xankəndidən görünür" - Ermənistan qəzeti

Ermənistanda nəşr edilən “Hraparak” qəzeti Azərbaycanın Şuşa şəhərində genişmiqyaslı tikinti-abadlıq işləri həyata keçirdiyini yazır.

Azsiyaset.com xəbər verir ki, erməni nəşri indi Şuşanın işıqlarının gecələr hətta Xankəndindən göründüyünü qeyd edir.

“Yol və tuneldən əlavə yüksək gərginlikli elektrik stansiyası da tikilib. Şuşaya aparan yolda, hələ sovet illərində tikilmiş və Şuşanı qidalandıran yarımstansiyanın bir neçə metrliyində cəmi bir neçə ay ərzində yeni yarımstansiya tikilib, indi bu yarımstansiya Şuşanı elektriklə qidalandırır və şəhəri işıqlandırır. Azərbaycan işıqları ilə möhtəşəm şəkildə işıqlandırılmış Şuşa şəhəri indi hətta Stepanakertdən (Xankəndi, - red.) görünür. Ruslar isə Azərbaycan hərbçilərinin baxışları altında Xankəndinə keçib gedənlərin pasportlarını yoxlayır”, - qəzet yazır.

Qeyd edək ki, “Azərenerji” ASC cəmi bir neçə ayda nəinki Şuşada, o cümlədən Kəlbəcərdə və Füzulidə yeni yarımstansiyalar tikib, hazırda Zəngilan, Qubadlı və Ağdamda yarımstansiyaların tikintisi davam edir. Uzun illərdir Qarabağda yoxsulluq və səfalət içərisində yaşayan ermənilər üçün bu cür geniş miqyasda və bu sürətlə abadlıq-yenidənqurma işləri, müasir infrastrukturun qurulması əlbəttə ki, işğal nəticəsində üzləşdikləri vəziyyətlə Azərbaycanın azad edilmiş ərazilərində baş verən dəyişikliklər arasında müqayisə aparmaq imkanı yaradır. Və onlar cəmi bir neçə ay əvvəl baş nazir Nikol Paşinyanın “boz və miskin şəhər” adlandırdığı Şuşanın işıqlarına Xankəndindən tamaşa edib gec-tez bu nəticəyə gələcəklər-normal yaşamaq üçün Azərbaycan pasportlarını almaqdan başqa yol yoxdur!