Ermənilər hərbi toplanışa yığışır - Nəyə nail olmaq istəyirlər?

Ermənistanda ehtiyata buraxılmış hərbi qulluqçuların yeni toplanışı elan edilib. Toplanış sentyabrın 15-dən dekabrın 15-nə qədər davam edəcək. Kampaniyada ehtiyada olan zabitlərin, gizirlərin, sıravi əsgərlərin iştirak edəcəyi bildirilir. 

Erməni ictimaiyyəti bu xəbəri oxuyandan sonra bir qədər narahat olub ki, birdən yenə xalqın uşağını Qarabağa basıb qırdırarlar. Əllərindən gəlməyən iş deyil, bir-iki dəfə belə şeylər ediblər. 

Ancaq işin içində olan mütəxəssislər deyirlər ki, narahatlığa əsas yoxdur, bu hərbi toplanışın iki məqsədi var: 1. Azərbaycanın Türkiyə və Pakistan hərbçiləri ilə birgə keçirdiyi təlimlərə cavab vermək; 2. Azərbaycana "xox gəlmək", başqa sözlə, "ölməmişik, hələ sağıq, dirəşəcəyik" mesajı vermək.

Qırılmışın bir ağsaqqalı da yoxdur ki, desin: "Daşı ətəyinizdən tökün. 100 ildə bircə dəfə day-daysız döyüşə çıxdınız, xurd-xəşil oluncuya qədər döyüldünüz. Bəs deyilmi? Oturun yerinizdə, həlim olun, sülhə gəlin". 

Xeyri yoxdur. Bu millətin rəhbərləri, bədnam ziyalıları il on iki ay və 24 saat "qədim xalq", "böyük dövlət" deyə zəvzəyə-zəvzəyə xalqın başını xarab ediblər, ona görə də daha bir dəfə başları daşa dəyməyincə, qaşınacaqlar. 

Öcəşkənliyin də bir qədəri var. Bunlarda o limit də yoxdur. Biz sabah özümüzü qayanın başında aşağı dığırlasaq, bir də görəcəyik, budur ha, ermənilər dərə aşağı yumbalanır.

Necə deyərlər, Allah ağıl versin. Di gedin, döyüşmək məşqi edin, mülayim olmaqdan imtina edin. Görək, sərt olub nə edəcəksiniz(musavat.com).