ABŞ-dan Kremlə daha bir zərbə - Rusiya bazar iqtisadiyyatı statusunu itirir
ABŞ-ın Ticarət Nazirliyi gübrə istehsalı ilə məşğul olan bir sıra şirkətlərin tələbi ilə Rusiyanı bazar iqtisadiyyatı statusuna malik ölkələr siyahısından çıxarır.
Bu barədə “Kommersant” qəzeti məlumat yayıb.
Qəzetin informasiyasına əsasən, Birləşmiş Ştatların “CF Industries Nitrogen”, “Terra Nitrogen”, “Terra International” kimi iri korporasiyaları Rusiyada gübrə sahəsində qeyri-sağlam rəqabət mühitinin yaradıldığını əsas göstərərək bununla bağlı müvafiq sənədləri nazirliyə təqdim ediblər.
Verilən xəbərə görə, ABŞ xarici ölkələrlə ticarət münasibətlərində belə bir status üçün meyarları çoxdan müəyyənləşdirib. Bunların içində valyuta kursunun çevikliyi, xarici investorların fəaliyyət azadlığı, qiymətlərin düzgün tənzimlənməsi, işçilərin rəhbərliklə maaşla bağlı danışıqlar apara bilməsi üçün böyük hüquqlara malik olması və s. faktorlar var.
Amerikan şirkətlərinin hüquqlarını nazirlikdə “WilmerHale” hüquq firması təmsil edir. Məhz bu firma vaxtilə Dünya Bankının “Doing Business” adlı hesabatlarını incələyərək Rusiya barəsində aşağı reytinqlərin müəyyənləşirilməsinə nail olmuşdu. Şirkətin gəldiyi nəticələrdən sonra bank hətta həmin hesabatlaırn hamısından imtina etmək məcburiyyətində qalmışdı.
Ekspertlər Rusiyanın bazar iqtisadiyyatı ölkəsi statusunu itirməsi halında ildə ən azı 100 milyon dollardan məhrum olacağını deyirlər.
