Tonoyanın evində axtarışlar aparılır - Sabiq nazirin və daha bir neçə generalın həbsi gözlənilir
Ermənistanın sabiq müdafiə naziri, 44 günlük müharibə dövründə erməni ordusuna rəhbərlik etmiş David Tonoyanın evində axtarış aparılır.
Bu barədə Ermənistanın “Hraparak” nəşri məlumat yayıb. Məlumatda deyilir ki, sabiq nazirin evində Milli Təhlükəsizlik Xidmətinin(MTX) apardığı axtarış başa çatandan sonra Tonoyana rəsmi ittiham elan olunacağı gözlənilir. Qəzet yazır ki, Tonoyanla bərabər hərbi aviasiyanın sabiq rəisi Avetik Muradyan və sabiq Baş Qərargah rəisinin müavini Stepan Qalstyanın da mənzilində axtarış gedir. Bu şəxslərin MTX-yə çağırıldığı qeyd edilir.
Qəzet həmçinin iddia edir ki, tezliklə növbə digər sabiq müdafiə naziri Seyran Ohanyana və sabiq Baş Qərargah rəisi Yuri Xaçaturova da çatacaq. Ehtimal olunur ki, axtarışlar və digər əməliyyat tədbirləri yararsız aviasiya raketlərinin alışı ilə bağlıdır. Rəsmi strukturlar hələlik baş verənlərlə bağlı hər hansı məlumat yaymayıblar.
Bununla yanaşı, məlumatda ötən həftənin sonunda hərbi aviasiyanın sablq rəisinin dələduzluqda ittiham olunmasına dair MTX-nin məlumatı xatırladılır. İstintaq iddia edir ki, o, saxta sənədlər vasitəsilə hələ 2011-ci ildə yararsız olduğu bilinən aviasiya raketlərini sonradan silahlanmaya qəbul edib. Və bu yolla da büdcənin 4.6 milyonluq vəsaiti mənimsənilib. Ancaq bu mənimsəmədə və saxtakarlıqda onunla yanaşı yuxarıda adı keçən digər erməni generallarının da iştirakı olub. Məlumatda o da qeyd olunur ki, həmin raketlərlə bağlı saxtakarlıqlar daha əvvəllər həyata keçirilsə də, onların orduya, silahlanmaya qəbul edilməsi məhz David Tonoyanın nazir olduğu dövrdə baş verib.
Xatırladaq ki, David Tonoyan nazir olan vaxt Azərbaycanı hədələyərək, “yeni ərazilər üçün yeni müharibə” tezisini səsləndirməsi, Yuri Xaçaturov KTMT-nin baş katibi olmasına baxmayaraq Nikol Paşinyan hökuməti tərəfindən həbs olunması, Seyran Ohanyan isə Qarabağda törətdiyi cinayətlər, Azərbaycan Ordusunun darmadağın etdiyi “Ohanyan səddi” və 44 günlük müharibənin son günlərində Şuşadan qaçmasıyla yadda qalıb.
