Saakaşvili Gürcüstana necə qayıdıb? - "Azərbaycandan da keçə bilərdi"

Gözlənilmədən Gürcüstanda peyda olan Mixeil Saakaşvilinin vətəninə necə döndüyü barədə müxtəlif mülahizələr irəli sürülməkdədir.

“Azsiyaset" azpolitika.info-ya istinadla xəbər verir ki, Gürcüstan mətbuatında sabiq prezidentin ən çox Türkiyə ərazisindən keçərək ölkəyə gəldiyi ehtimalı üzərində dayanılır. Ancaq Ermənistan və Azərbaycan variantlarını da müzakirə edənlər var. Gürcüstandakı tanınmış təhlükəsizlik mütəxəssislərindən biri olan Besik Aladaşvili ölkə mətbuatına bildirib ki, sabiq prezident böyük ehtimalla Ukraynadan Türkiyəyə gəlib, oradansa ölkələr arasındakı quru sərhədlərindəki boşluqlardan istifadə edərək Gürcüstana keçə bilib. O, deyib ki, Türkiyə ilə quru sərhədləri tam qorunmur və Saakaşvilinin bundan xəbəri olub. Bu səbəbdən onun bələdçilərin köməyilə Türkiyədən ölkəyə qeyri-qanuni şəkildə keçdiyi güman olunur.

Lakin ekspertin fikrincə, digər variantları – Saakaşvilinin Azərbaycandan, yaxud Ermənistandan keçməsi ehtimallarını da tam istisna etmək olmaz. Hər iki ölkə ilə Ukraynanın hava əlaqəsi var. Ancaq bununla yanaşı B.Aladaşvili qeyd edib ki, hər iki ölkədə əhalinin yarıdan çoxu Saakaşvilini üzdən tanıyır. Bu da sabiq prezident üçün riskləri artırmış olardı. Türkiyədə isə bu şəxs Cənubi Qafqazda olduğu qədər populyar deyil. Ona görə də Saakaşvilinin məhz Türkiyədən, özü də quru sərhədlərdən keçməklə Gürcüstana gəlməsi ehtimalı daha yüksəkdir.

Onu da qeyd edək ki, Gürcüstan qanunvericiliyinə görə sərhədi qanunsuz keçdiyi üçün Saakaşvili 5 ilədək azadlıqdan məhrum oluna bilər.