"Şuşada niyə yaşayış evləri tikməmişdilər? Pul yox idi?" - PAŞİNYAN

"Şuşa problemi həmişə olub. Azərbaycan heç zaman azərbaycanlıların Qarabağa qaytarılması ideyasından imtina etməyib.”

Bunu Ermənistanın Baş naziri Nikol Paşinyan Litvaya səfəri zamanı erməni icmasının nümayəndələri ilə keçirdiyi görüş zamanı söyləyib.

Şuşa mövzusunda danışan Paşinyan “azərbaycanlılar harada yaşamalı idilər” deyə sual verib və əlavə edib ki, ondan əvvəlki hakimiyyət azərbaycanlıların qayıdışına etiraz etməyib: “Erməni tərəfi bunu mübahisələndirməyib. Əksinə, danışıqlar stolu arxasında erməni tərəfi keçirilməli olan referendumda, sorğuda və s. Qarabağdan olan azərbaycanlıların da Dağlıq Qarabağın tamhüquqlu vətəndaşları kimi iştirakına razılıq verib. Belə olan təqdirdə, həmin azərbaycanlılar hara köçürülməli idilər? Məntiqi olaraq əvvəl yaşadıqları yerlərə.”

Sonra Paşinyan yenə əvvəlki hökuməti tənqid edərək, deyib: “Şuşa barədə 30 il danışıblar. Bəs, orada nə qədər yaşayış evi tikilib? Heç nə qədər. Niyə tikilməyib? Pul yox idi? Onlar(əvvəlki hakimiyyət-red.) şəhəri saxlaya biləcəklərinə əmin deyildilər. Düşünürəm ki, cavab aydındır”.