"Tehranın ehtimalı doğru deyil, Bakı bundan sonra tələb etdi ki..." - İranın sabiq səfiri Əfşar Süleymani

“İran və Azərbaycan Türkiyənin də iştirak edəcəyi danışıqlar aparmalıdır”.

"Azsiyaset" xəbər verir ki, bunu İranın Azərbaycandakı keçmiş səfiri Əfşar Süleymani “Anadolu” agentliyinə deyib.

O, Ermənistan daxilindəki yolların problemli olduğunu və bu səbəbdən İranın Avropaya çıxmaq üçün bu xətlərdən istifadə etmədiyini bildirib:

“İranlılar Azərbaycan, Xəzər, Rusiya və Gürcüstan marşrutlarına üstünlük verdilər. İran Gorus-Qafan marşrutunun bağlanacağı təqdirdə bu məsələdə Azərbaycan və Türkiyədən asılı vəziyyətə düşməsindən narahatdır, amma bu narahatlıq və ehtimal doğru deyil”.

Azərbaycan Prezidenti İlham Əliyevin İran yük maşınlarının Xankəndinə qanunsuz girişinə etiraz etdiyini və İranın bu ölkədəki səfirinə notanın verilməsinə diqqət çəkən Süleymani qeyd edib:

“İlham Əliyevin sözlərinə görə, İran Azərbaycanın etirazına müsbət cavab verməyib. Bakı bundan sonra Gorus-Qafan yolunda İran yük maşınlarından gömrük rüsumu tələb etdi. Bu addım İranın narahatlığına səbəb olub”.

Sabiq səfir bölgə ölkələri arasında əməkdaşlığın əhəmiyyətinə toxunaraq vurğulayıb:

“İran və Azərbaycan Türkiyənin də iştirak edəcəyi danışıqlar aparmalıdır. Bu yolla Rusiya kimi üçüncü ölkələr faktiki gərginlikdən faydalana bilməyəcək. Rusiya, ABŞ və digər bir sıra ölkələr İran, Türkiyə və Azərbaycanın maraqlarını nəzərə almırlar”.