Putinin sehrli sözləri avropalıları donmaqdan xilas edirmi? - Qaz bir neçə saatda iki dəfədən çox ucuzlaşdı
Rusiya prezidenti Vladimir Putinin Sankt-Peterburq qaz Forumunda dünənki çıxışı onu avropalıların nəzərində əsl xilaskara çevirib. Həmin gün oktyabrın 6-da Avropa birjalarında təbii qazın qiyməti fantastik həddə artaraq min kubmetr üçün 2 min dolları keçmişdi. Bu, cəmi bir neçə dəqiqə ərzində 40 faizlik sıçrayış nəticəsində baş vermişdi və analitiklər qazın qiyməti üçün yeni rekord təxmin edirdilər-2500 dollar!
Lakin Putinin çıxışından saatlar sonra Avropa birjalarında təbii qazın qiyməti eynilə bu cür sürətlə aşağı endi və bu gün oktyabrın 7-nə, günün birinci yarısına olan məlumatlara görə 1000 dollardan da aşağı düşdü.
Bəs Putinin həmin “sehrli sözləri” nədən ibarət idi?
"Azsiyaset" virtualaz.org-a istinadla xəbər verir ki, Rusiya prezidenti Avropanın energetika bazarında aylardır hökm sürən böhranla bağlı ilk dəfə danışdı, Avropa bazarında təbii qazın qiymətinin durmadan artmasına görə Rusiyanın günahlandırılmasına münasibət bildirdi.
Putin bəyan etdi ki, bu böhranda Rusiyanın rolu yoxdur. Və onun sözlərinə görə, günah elə avropalıların özlərindədir-onlar vaxtında Rusiyadan qazı uzunmüddətli müqavilələr əsasında almaq əvəzində birjalar üzərindən almağa üstünlük veriblər. Putin qeyd edib ki, “Qazprom” mövcud müqavilələr əsasında bütün öhdəliklərini yerinə yetirir və onun ölkəsi hazırda bazarları bürümüş bu spekulyativ ajiotajda maraqlı deyil.
Rusiya prezidenti habelə bildirdi ki, “Qazprom” Avropaya bu il rekord həcmdə qaz təchizatını həyata keçirə və qiymətin stabilləşməsinə kömək edə bilər.
Avropa bazarlarında qazın qiymətinin indiki kəskin artımı yeraltı qaz anbarlarının tam dolmamasından irəli gəlir və bunun da səbəblərindən biri Rusiyanın nəzərdə tutulandan az qaz nəql etməsidir. Hərçənd “Qazprom” bunu təsdiq etmir. Avropada isə Putinin Qərbə qarşı özünün ən güclü silahını işə saldığını deyirlər.
Putinin çıxışı bu baxımdan bazara dərhal təsir göstərib və birja spekulyantları qiyməti kəskin endiriblər. Lakin Putinin avropalıları qarşıda gözlənilən sərt qışda soyuqdan donmaqdan xilas etmək vədi necə deyərlər, elə-belə başa gələ bilməz. Rusiya bunun üçün tikintisi artıq başa çatmış və Qərbin uzun müddətdir əngəlləməyə çalışdığı “Şimal axını-2” kəmərinin işə salınmasının tezləşdirilməsini istəyir. Energetika naziri Aleksandr Novak deyib ki, kəmərin sertifikatlaşdırılması prosedurunun Avropa Komissiyası tərəfindən sürətlə başa çatdırılması Avropaya qaz nəqlini artırmağın yollarından biri ola bilərdi. Novakın sözlərinə görə, “Şimal axını-2” kəmərinin işə düşməsi avropalıları gələcəkdə bu cür qiymət ajiotajından da xilas edə bilər.
