Qırğızıstan Rusiyaya nota verdi - Rəsmi Bişkek hüquqi qiymət tələb edir
Qırğızıstan Respublikası Rusiya Federasiyasına nota verib.
TASS xəbər verir ki, etiraz notasını Rusiya Xarici İşlər Nazirliyinə Qırğızıstan Respublikasının Moskvadakı səfiri təqdim edib.
Bildirilib ki, notaya səbəb rus polisinin Qırğızıstan Respublikasının vətəndaşına qarşı fiziki güc tətbiq etməsi olub.
Qırğızıstan Respublikasının diplomatları qeyd ediblər ki, sosial şəbəkələrdə Rusiya polisinin respublika vətəndaşına qarşı fiziki güc tətbiq etdiyini əks etdirən video yayılıb. Hadisənin noyabrın 2-də baş verdiyi məlum olub.
Qeyd olunub ki, 21 yaşlı Qırğızıstan Respublikasının vətəndaşının şəxsiyyəti müəyyən edilib.
Diplomatik nümayəndəlik Rusiya tərəfinin hadisənin obyektiv və hərtərəfli araşdırılmasını təmin edəcəyinə və polis əməkdaşlarının hərəkətlərinə hüquqi qiymət veriləcəyinə inandığını bildirib.
