"Bu ölkəyə qarşı iyrənc münasibətə dözməyəcəyik" - Rusiyanın BMT-dəki daimi nümayəndəsi

Rusiya bir sıra xarici tərəfdaşların Bosniya və Herseqovinanın suverenliyinə hörmətsizlik etməsi ilə barışmayacaq.

"Azsiyaset" axar.az-a istinadla xəbər verir ki, bu açıqlama ilə Rusiyanın BMT-dəki daimi nümayəndəsi Vasili Nebenzya çıxış edib.

“Biz müharibədən sonrakı bütün dövr ərzində Bosniya və Herseqovinada siyasi vəziyyətin misli görünməmiş növbəti kəskinləşməsindən narahatıq. Vəziyyəti bir sıra xarici qüvvələrin məsuliyyətsiz hərəkətləri daha da gərginləşdirir. Rusiya Dayton razılaşmalarının təminatçılarından biri kimi baş verənlərə biganə qala bilməz. Biz bir sıra həmkarlarımızın bu ölkənin suverenliyinə qarşı nümayiş etdirdiyi və arxasında nifrətin dayandığı iyrənc münasibətə dözməyəcəyik", - Nebenzya vurğulayıb.

Qeyd edək ki, Bosniya və Herseqovinanın Rəyasət Heyətinin üzvləri - yerli xorvatlardan Zelko Komşiç, bosniyalılardan Şefik Caferoviç və Serbiya nümayəndəsi arasında fikir ayrılığı ölkədə vəziyyəti gərginləşdirib.