"Azərbaycan və Ermənistan arasında atəşkəs rejimi mövcuddur, lakin bu ..." - Robert Sekuta

"Ötən il Azərbaycanda baş verən hadisələr bütün dinamikanı dəyişdirdi. Bu dəyişiklik Azərbaycanın yenidən əzəli torpaqlarında nəzarətini bərpa etdi və regionda söz sahibinə çevirdi".

Bu sözləri ABŞ-ın Azərbaycandakı sabiq səfiri Robert Sekuta Qlobal Bakı Forumunda deyib. O qeyd edib ki, hazırda Azərbaycan və Ermənistan arasında atəşkəs rejimi mövcuddur, lakin bu sülh müqaviləsi deyil:

"Azərbaycan və Ermənistan arasında sülh müqaviləsi imzalanmalıdır. Açıq toqquşmalar baş verəndə düşündük ki, bu heç vaxt ola bilməzdi. Amma bu situasiya ona dəlalət etdi ki, iki ölkə arasında müharibə hər məqamda  baş verə bilərdi. Biz sülh müqaviləsinin imzalanmasının tezləşdirilməsi üçün Azərbaycan və Ermənistana kömək etməliyik. Amma burada öz maraqlarımızı da nəzərə almalıyıq. 30 ildir davam edən düşmənlik Azərbaycan və Ermənistan xalqına daha çox təsir edib. Əvvəllər azərbaycanlılar və ermənilər qarışıq nikaha girirdilər. Amma indi gənc nəsil arasında belə bir ənənə yoxdur. Yaddaşda yalnız düşmənlik var. Beləliklə də sülhün bərpa olunması üçün iki ölkə rəhbərindən müəyyən zaman lazım gələcək".

Robert Sekuta qeyd edib ki, Ermənistan öz işğlaçı siyasətinə son qoymalıdır:

"Sülh müqaviləsi Ermənistana fayda gətirəcək. Ermənistan bazarı kiçikdir və onun iqtisadi inkişafı digər qonşu ölkələrdən aslıdır. Əgər qonşu ölkələrlə münasibətləri düzəltməsə, bu onun özünə ziyan vuracaq.Belə başa düşürük ki, münasibətlərin bərpa edilməsində  xalq ölkəyə dəstək çıxmayacaq. Burada oturanların hamısı Azərbaycan və Ermənistan arasında körpü yaratmağın yollarını axtarmalıdır. Düşünürəm ki, ötən ilin noyabrında imzalanan bəyannamə qüvvədə qalsın və bu barədə danışıqlar aparılsın, iqtisadi əməkdaşlıq daha çox inkişaf etsin. Bu çox vacibdir. Biz bu prosesə köməklik göstərə bilərik. Düşünürük ki, ABŞ şirkətləri bu layihələrdə iştirak edə bilər".