İran ermənilərin çəkdiyi yeni yoldan narazıdır - Dar və təhlükəli

Məlum olduğu kimi, Azərbaycan Gorus-Qafan yolunun öz suveren ərazisindən keçən hissəsində sərhəd və gömrük nəzarət-buraxılış məntəqələri quraşdırıb. Artıq erməni maşınları da bu ərazidən keçmək üçün Azərbaycan qanunlarına uyğun prosedurlar keçməlidirlər. 

Bundan öncə isə eyni tələb İrandan Ermənistana yük daşıyan İran maşınlarına aid edilib. Buna cavab olaraq, Ermənistan hökuməti tez-tələsik Gorus-Qafan yoluna alternativ Tatev-Aqvan yolunu çəkib. Lakin son günlər həmin yolda baş verənlər göstərir ki, bu marşrut heç də ermənilərin və iranlıların ümidlərini doğrultmur.

“Azadlıq Radiosu”nun erməni xidməti xəbər verir ki, sözügedən alternativ yoldan istifadə edən İran yük maşınlarının sürücüləri yolun keyfiyyətindən şikayət edirlər. Yolun vəziyyətilə yerində tanış olan jurnalistlər özləri də yolun çox əlverişsiz və təhlükəli olduğunu bildiriblər və hətta İrana aid bir yük maşınının az qala dərəyə düşəcəyini əks etdirən fotonu paylaşıblar.

İranlı sürücülər isə jurnalistlərə deyiblər ki, yolun əksər hissələri çox dar və təhlükəlidir. Buna görə də iri yük maşınlarının bu yoldan istifadə etməsi heç də məqsədəuyğun deyil: “Qarşıdan maşın gəlsə, dayanmalı olursan. Bu isə heç yaxşı deyil, çünki maşınlar yığılmağa başlayır. Bir çalaya düşdükdə isə texnika gözləməli oluruq, hansı ki, o da həmin ərazilərdə yoxdur.”

Bir sözlə, fars-erməni “qardaşlığı” indi də Nikol Paşinyanın yeni çəkdirdiyi sınıq-salxaq yolla sınağa çəkilir. Yeri gəlmişkən qeyd edək ki, Paşinyan bir neçə gün əvvəl həmin yoldan istifadə etdiyini və onun “çox keyfiyyətli” olduğunu bildirmişdi. Ancaq azca qar yağan kimi, yolun demək olar ki, bağlandığını və hərəkətin mümkünsüz olduğunu görən ermənilər sosial şəbəkələrdə hökumət başçısına öz “ürək sözlərini” göndərməkdən çəkinmirlər.