Rusiyanın işğal etdiyi Krımda XIII əsrə aid müsəlman məzarları tapıldı - FOTO

Sözsüz ki, aşkar edilmiş məzar daşları XII-XIII əsrlərdə Krımda yaşayan qədim türk tayfalarına aiddir...

Rusiyanın Ukraynadan işğal etdiyi  "Starıy Krım"(Köhnə Krım) şəhərində yerli stadionun yenidən qurulması zamanı üzərində  ərəb yazıları olan qəbir daşları tapılıb. Mütəxəssislər onların  XIII əsrə aid olması qənaətinə gəlib.

Bu haqda "Krım 24" telekanalı reportaj yayımlayıb.

Tapılmış insan sümükləri antropoloji ekspertizaya göndərilib. Beş qəbir daşı və onların fraqmentləri  isə yerli muzeyin eksponatlarına çevrilib - onlar orta əsr Solxat şəhərinin memarlıq abidələrinin ekspozisiyasını tamamlayacaqlar.

“Yazılar salamat qalıb və onlar çox yaxşı oxunur – bu ərəb yazısıdır. Biz də öz növbəmizdə mütəxəssisləri dəvət etdik. Yazılara əsasən məlum oldu ki, bunlar Krım ərazisində ən erkən müəyyən edilmiş müsəlman məzar daşlarıdır. Onların tarixi 1285-ci ilə aiddir" - deyə  "Krım 24" telekanalına açıqlamasında Köhnə Krımın tarix və arxeologiya muzeyinin rəhbəri Rasim Kadırov bildirib.

İndi stadionun yenidən qurulması dayandırılıb - o, yalnız arxeoloji qazıntılardan sonra davam etdiriləcək. Köhnə Krım administrasiyasının rəhbəri Qriqori Balabanov işlərin 2022-ci ildə davam etdiriləcəyinə ümid edir. Amma iş zamanı başqa əşyalar tapılarsa, muzeyə təhvil veriləcək.

Qeyd edək ki, Krım 2014-cu ildə Rusiya tərəfindən "ilhaq" adı altında işğal edilib.