NATO-nun Baş katibi Stoltenberq Polşa prezidenti ilə görüşdən sonra Rusiyaya çağırış etdi - "Ukraynanı dəstəkləyirik..."

Yens Stoltenberq Polşa prezidenti Anjey Duda ilə görüşdən sonra bildirib ki, NATO sayıqlığını qoruyur və Ukraynanı həm siyasi, həm də praktiki cəhətdən dəstəkləyir. NATO-nun baş katibi izah edib ki, bu, heç də onun gərginliyi azaltmağa çağırdığı Rusiyanın ünvanına təhdid deyil.

Bu barədə Polşanın “Dziennik Gazeta Prawna” nəşri xəbər verir.

NATO-nun baş katibi Yens Stoltenberq mətbuat konfransı zamanı bildirib ki, Polşa prezidenti Anjey Duda ilə bugünkü görüşdə əsas müzakirə mövzularından biri Rusiyanın Ukrayna ilə sərhəddə hərbi varlığını artırması olub. 

“Biz Moskvanın yaydığı aqressiv ritorika və dezinformasiya ilə birlikdə qüvvələrin böyük və qeyri-adi konsentrasiyasını görürük. Biz Rusiyanı şəffaflığı artırmaq, gərginliyi azaltmaq və təsirləri aradan qaldırmaq üçün tədbirlər görməyə çağırırıq. NATO sayıqlığını qoruyur və biz həm siyasi, həm də praktiki məsələlərdə Ukraynanı dəstəkləməyə davam edirik. Bu, Rusiya üçün təhlükə deyil. NATO Ukraynaya özünü təcavüzdən müdafiə etməyə kömək edir”, - deyə Stoltenberq bildirib.

Onun sözlərinə görə, gələn həftə NATO xarici işlər nazirləri təhlükəsizlik vəziyyətini müzakirə etmək üçün Riqaya toplaşacaqlar. Onlar Ukrayna və Gürcüstandan olan həmkarları ilə də görüşəcəklər. 

“Bu, bizim dəstəyimizin güclü sübutudur”, - deyə NATO-nun baş katibi yekunlaşdırıb.